سرینگر میں ایک تقریب کے دوران بھارتیہ جنتا پارٹی کے قومی نائب صدر اویناش رائے کھنہ نے اخباری نمائندوں سے بات کرتے ہوئے کہا کہ انکی حکومت عوام کے جذبات اور مطالبات کے مد نظر جموں وکشمیر میں ڈیمو گرافک سسٹم کو محفوظ رکھنے پر فیصلہ لے گی۔
بی جے پی کی جانب سے سرینگر کے ٹیگور ہال میں ایک تقریب منعقد کی گئی جس میں سینکڑوں مقامی نوجوانوں اور بی جے پی کارکنان نے شرکت کی۔
اس تقریب میں اویناش رائے کھنہ مہمان خصوصی تھے جبکہ تقریب بی جے پی کے نیشنل یوتھ نائب صدر اعجاز حسین کی جانب سے منعقد کی گئی تھی۔
بی جے پی یوتھ ونگ کے نائب صدر اعجاز حسین نے کہا کہ حکومت جموں و کشمیر کے نوجوانوں کے روزگار کے لیے سنجیدہ ہے۔
تقریب کے دوران کشمیر سے تعلق رکھنے والے کئی نوجوانوں نے بھارتیہ جنتا پارٹی میں شمولیت اختیار کی۔
ضلع بانڈی پورہ کے ہاجن علاقے کے نوجوان نے کہا کہ بی جے پی نوجوانوں کے لیے کام کر رہی ہے اور اسی بات سے متاثر ہوکر وہ اس پارٹی میں شامل ہوئے ہیں۔
وہیں بڈگام سے تعلق رکھنے والے نوجوان آغا سید حسین نے ای ٹی وی بھارت سے بات کرتے ہوئے کہا کہ مرکزی حکومت کی جانب سے نوجوانوں کے کام کو دیکھتے ہوئے وہ اس پارٹی کا حصہ بنے ہیں۔
