اننت ناگ: مرکز کے زیر انتظام یوٹی جموں و کشمیر کے اننت ناگ کے لارنو شیخ پورہ کے دورے کے دوران بی جے پی کے رہنما محمد صدیق خان نے مقامی پارٹی کارکنان اور مقامی باشندوں سے ملاقات کی اور موجودہ صورتحال پر تبادلہ خیال کیا۔ بی جے پی کے سینیر لیڈر محمد صدیق خان کا کہنا ہے کہ کشمیر میں بھارتیہ جنتا پارٹی غریب عام کے مفاد کے لئے کام کرتی ہے۔ آج تک غریب عوام کا استحصال کیا گیا تھا مگر بھارتیہ جنتا پارٹی غریب عوام کو ہر ممکن سہولت فراہم کرنے میں پیش پیش رہتی ہے۔ پارٹی کا ہر کارکن عوام کو راحت اور بہتر سہولت پہنچانے کا کام کر رہا ہے۔
صدیق خان نے کہا کہ نریندر مودی نے کشمیر کو ایک نئی سمت کی جانب رواں دواں کیا ہے۔ انہوں نے انتظامیہ سے اپیل کی کہ لارنو کے پسماندہ لوگوں کو سرکاری اراضی سے بے دخل نہیں کیا جائے کیونکہ یہاں کے لوگوں کی روٹی روزی اسی زمین پر منحصر ہے۔ انہوں نے لوگوں کو یقین دلایا کہ وہ زمینوں سے بے دخلی کا معاملہ انتظامیہ کے ساتھ اٹھاۓ گے اور انکے لئے انصاف کی رسائی کو ممکن بنایا جائے گا۔