دشواریوں کے بیچ برفباری سے لوگ لطف اندوز

جہاں اس بھاری برفباری کی وجہ سے لوگوں کو گونا گوں مشکلات کا سامنا کرنا پڑ رہا ہے تو دوسری جانب وادی کشمیر کے پہاڑ اور میدان سفید چادر اوڑھے خوبصورت اور دلکش مناظر بھی پیش کر رہے ہیں۔

مسلسل چار روز سے بھاری برفباری کا سلسلہ جاری رہنے کے باعث وادی کشمیر، خطہ پیر پنچال اور وادی چناب میں بدھ کے روز بھی معمول کی عوامی اور کاروباری سرگرمیاں مفلوج رہیں۔

جبکہ متواتر برفباری اور کم روشنی کی وجہ سے کشمیر کا باقی دنیا سے ہوائی اور زمینی رابطہ مسلسل منقطع رہا۔ جواہر ٹنل کے آرپار لگ بھگ 3 فٹ، قاضی گنڈ میں تقریباً 2 فٹ اور بانہال میں ایک فٹ سے زیادہ برف ریکارڈ کی گئی۔

ادھر وادی کشمیر میں بھاری برفباری کے نتیجے میں درجنوں دیہات اور دور افتادہ علاقوں کا تحصیل صدر مقامات اور ضلع ہیڈکوارٹرز سے رابطہ منقطع ہوگیا ہے۔ اہم رابطہ شاہراہوں پر پھسلن پیدا ہونے سے گاڑیاں کچوے کی چال سے چل رہی ہیں۔

ایک جانب جہاں اس بھاری برفباری کی وجہ سے لوگوں کو گونا گوں مشکلات کا سامنا کرنا پڑ رہا ہے تو دوسری جانب وادی کشمیر کے پہاڑ اور میدان سفید چادر اوڑھے خوبصورت اور دلکش مناظر بھی پیش کر رہے ہیں۔ ان پرکشش مناظر کا لطف نہ صرف مقامی بلکہ کشمیر کی سیر پر آئے ہوئے سیاح بھی آٹھارہے ہیں۔

شہر سرینگر میں اس برفباری سے نہ صرف مقامی بلکہ غیر مقامی سیاح بھی خوب لطف اٹھاتے ہوئے دیکھے جارہے ہیں۔ وہیں ان دلکش مناظر سے لطف اندوز ہونے کے ساتھ ساتھ یہ سیاح ان خوبصورت مناظر کو اپنے کیمروں میں قید کرتے ہوئے بھی دیکھے جارہے ہیں۔

سیاحوں کا کہنا ہے کہ 'کشمیر جتنا خوبصورت ہے، اتنے ہی یہاں کے لوگ مہمانواز ہیں۔'

سیاح اور مقامی نوجوان بھی اس برفباری میں اپنے موبائل فونز اور کیمروں سے سیلفی لیتے ہوئے دیکھے جارہے ہیں جبکہ ایک دوسرے کے ساتھ روایتی شین جنگ کرتے ہوئے ان نوجوان لڑکی اور لڑکوں کو دیکھا جا سکتا ہے۔

ان کاکہنا ہے کہ اگرچہ اس برفباری میں لوگوں کو کئی ساری دشواریوں کا سامنا کرنا پڑتا ہے۔ تاہم یہ برفباری مسقبل کے لیے ایک نیک شگون ہے۔

واضح رہے کہ وادی کشمیر میں 3 اور 4 تاریخ کی درمیانی شب سے وقفے وقفے سے برفباری ہو رہی۔ تاہم محکمہ موسمیات نے 6 جنوری سے موسم میں بہتری آنے کی پیش گوئی کی ہے۔