بارہمولہ: برفانی تودے سے بچاؤ کے سلسلے میں بیداری کیمپ

اس بیداری کیمپ میں شریک دیہاتیوں نے فوج کے اس اقدام کی سرہانا کی کیونکہ اس پروگرام کے ذریعے انھیں برف کے نیچے پھنسے لوگوں کو بچانے سے متعلق جانکاری فراہم کی گئی۔

بھارتی فوج کی برفانی تودہ بچاؤ ٹیم نے پیر کو جموں وکشمیر کے ضلع بارہمولہ میں برفانی تودوں سے متعلق بیداری کیمپ کا انعقاد کیا۔

یونٹ نے براہ راست مشقوں کا مظاہرہ کیا جس میں دکھایا گیا کہ برفانی تودے گرنے کے دوران پھنسے لوگوں کو کیسے بچایا جائے۔ انہوں نے لوگوں کو ریسکیو پروٹوکول کے بارے میں بھی آگاہ کیا جنہیں برفانی تودے کے دوران عمل کرنے کی ضرورت ہے۔

مقامی لوگوں کو امدادی کارروائی کے دوران ضروری طبی سہولیات کے بارے میں بھی جانکاری فراہم کی گئی ۔ کارڈز، بیکنز، پروبز ، سمیت مختلف سامان کے استعمال کا بھی مظاہرہ کیا گیا۔

برفانی تودہ یونٹ کے انچارج لیفٹیننٹ کرنل پرنس روہت نے کہا کہ ' پیر پنجال علاقوں میں سخت سردی کے مہینوں میں شدید برف باری کی وجہ سے فوج کی برفانی تودہ بچاؤ ٹیم ہمیشہ اعلی چوکس رہتی ہے۔'

انہوں نے مزید کہا کہ ' فوج بھی لائن آف کنٹرول (ایل او سی) کے قریب علاقوں کے برفانی تودوں کے خطرات سے بیداری پھیلانے کی کوشش کرتی ہے۔ کسی بھی قسم کی صورتحال میں فوج ان کے لئے ہمیشہ پیش پیش رہتی ہے۔

برفانی تودہ یونٹ کے ایک ٹرینر کیپٹن کرمویر سنگھ نے بتایا کہ اس ٹیم کو گلمرگ کے ہائی الٹیٹیوٹی وارفیئر اسکول میں تربیت دی گئی ہے۔

سنگھ نے کہا کہ ' خصوصی تربیت، جدید ترین آلات اور سخت خطوں میں کام کرنے کے تجربے کی وجہ سے برفانی تودے سے بچاؤ ٹیم ان علاقوں میں کسی بھی قسم کی صورتحال سے نمٹنے کے قابل ہے۔'

انہوں نے بتایا کہ فوجیوں کی تربیت کے ساتھ اس ٹیم نے برفانی تودے کے خطرات کے بارے میں بیداری پھیلائی۔

اس بیداری کیمپ میں شریک دیہاتیوں نے فوج کے اس اقدام کی سرہانا کی کیونکہ اس پروگرام کے ذریعے انھیں برف کے نیچے پھنسے لوگوں کو بچانے سے متعلق جانکاری فراہم کی گئی۔

کیمپ میں شریک ایک گاؤں کے پنچ فاروق احمد بجاد نے بتایا کہ اس علاقے کے دیہات میں ہر برس شدید برف باری ہوتی ہے۔اس صورتحال میں فوج ہی ہمارے لئے واحد سہارا ہے۔'

کیمپ کے ایک شریک محمد یوسف نے کہا کہ ' فوج نے ہمیں بتایا کہ ہمیں شدید برف باری کے دوران دستبردار نہیں ہونا چاہئے۔ '