سڑک حادثے میں فوجی جوان زخمی

فوجی جوان کو زخمی حالت میں آرمی کمانڈ اسپتال ادھمپور منتقل کیا گیا ہے۔

جموں و کشمیر کے پہاڑی ضلح رامبن میں ایک سڑک حادثہ پیش آیا ہے جس کے نتیجے میں ایک فوجی جوان شدید زخمی ہوگیا۔

اطلاعات کے مطابق اتوار دیر شام ماروگ - گام رابطہ سڑک پر ایک گاڑی رامبن سے ماروگ کی طرف جارہی تھی کہ سولی گام کے مقام پر تیز رفتار گاڑی 60 فٹ گہری کھائی میں جا گری جس کے نتیجہ میں گاڑی پر سوار جوان سچن سنگھ (23) ولد پون سنگھ ساکنہ گام تحصیل و ضلع رامبن شدید طور زخمی ہو گئے۔

پولیس اور مقامی رضاکاروں نے بچاؤ مہم شروع کر کے زخمی جوان کو ضلع ہسپتال رامبن منتقل کیا جہاں ڈاکٹروں نے ابتدائی امداد کے بعد خصوصی علاج کے لیے آرمی کمانڈ ہسپتال ادھمپور منتقل کر دیا۔

ذرائع کے مطابق زخمی جوان نئی گاڑی لے کر گھر جارہا تھا کہ راستے میں حادثہ کا شکار ہو گیا۔ رامبن پولیس نے زیر دفعات 279,337 آئی پی سی کے تحت معاملہ درج کر کے تحقیقات شروع کردی ہے۔