کپواڑہ: فوج نے ماں اور نوزائیدہ بچے کو چارپائی سے گھر پہنچایا

وادی کشمیر کے دور داراز علاقوں کی رابطہ سڑکوں سے برف نہ ہٹائے جانے کی وجہ سے مقامی باشندوں کو کبھی کبھی کافی مشکلات کا سامنا کرنا پڑتا ہے۔

جموں و کشمیر کے سرحدی ضلع کپواڑہ کے لولاب علاقے میں جاری برفباری کے دوران بھارتی فوج نے ایک ماں بچے کی جوڑی کو گھر پہنچنے میں مدد کی۔

ذرائع کے مطابق لولاب علاقے میں برفباری کے دوران ایک خاتون اپنے نوزائیدہ بچے سمیت سڑک پر پھنس گئی تھی جس کے بعد فوج کی ایک ٹیم وہاں پہنچ اور انہیں مدد پہنچائی۔

برفباری کے دوران فوج نے دونوں ماں اور بچے کو چارپائی پر بٹھا کر کاندھوں پر گھر تک پہنچانے میں مدد کی ۔

اطلاعات کے مطابق 28 آر آر کے فوجی اہلکاروں نے بھاری برفباری میں تقریبا 6 کلو میٹر دور تک ماں اور نوزائیدہ بچے کو چارپائی پر اٹھا کر گھر تک پہنچایا۔

مقامی لوگوں اور صحت عملہ نے فوج کے اس اقدام کی تعریف کی۔ وہیں زچہ اور بچے کے افراد خانہ نے فوج کا شکریہ ادا کیا اور کہا کہ مارکول کیمپ میں ڈیوٹی پر موجود فوجی جوانوں نے ان بروقت مدد کرکے ایک نہیں بلکہ دو جانیں بچانے میں مدد کی۔