جموں و کشمیر: انجمن اسلامیہ کے سربراہ کے خلاف بغاوت کا مقدمہ درج

جموں و کشمیر کے پہاڑی ضلع ڈوڈہ میں پولیس نے ہفتہ کے روز بھدرواہ کی معروف مذہنی انجمن ’انجمن اسلامیہ‘ کے صدر کے خلاف مبینہ طور پر جمعہ کے خطبہ میں اشتعال انگیز بیان دینے کا الزام عائد کرتے ہوئے پر مقدمہ درج کیا ہے۔

پولیس کے مطابق بھدروہ پولیس اسٹیشن حدود میں نماز جمعہ کے اہتمام کے ذریعہ ضلع مجسٹریٹ کے احکامات کی خلاف ورزی کرنے کے الزام میں پرویز احمد شیخ کے خلاف مقدمہ درج کیا گیا۔

انجمن اسلامیہ کے صدر پر دفعہ 124 اے (بغاوت) اور 153 اے (مذہب، نسل، مقام پیدائش کی بنیاد پر مختلف گروہوں کے مابین دشمنی کو فروغ دینے)، 505 بی، وبائی امراض کا ایکٹ 188 آئی پی سی کے تحت مقدمہ درج کیا گیا ہے۔ قبل ازیں جامع مسجد بھدرواہ میں جمعہ کے اجتماع سے خطاب کا پولیس نے جائزہ لیا اور مقدمہ درج کرنے کا فیصلہ کیا۔

ڈوڈہ پولیس کے تفتیشی افسر نے کہا کہ پرویز احمد شیخ کی تقریر اشتعال انگیز، جان بوجھ کر اور ملک دشمنی پر مبنی تھی۔ انہوں نے مزیاد کہا کہ شیخ کا ارادہ معاشرے میں عدم استحکام پیدا کرنا تھا اور بھدروہ پولیس کے اعلی عہدیدار اس معاملے کی تحقیقات کر رہے ہیں۔