All party Dharna concluded in jammu جموں میں مختلف سیاسی جماعتوں کا بی جے پی کے خلاف احتجاج

جموں کے مہاراجہ ہری سنگھ پارک میں ریاست کی اپوزیشن جماعتوں کے رہنما اور کارکنان نے بی جے پی کے خلاف احتجاج کیا۔ ان کا کہنا تھا کہ بی جے پی کی قیادت والی مرکزی حکومت سے جموں و کشمیر کو بہت نقصان پہنچا ہے۔

جموں:مرکز کے زیر انتظام جموں و کشمیر کے ضلع جموں کے مہاراجہ ہری سنگھ پارک میں ریاست کی اپوزیشن جماعتوں کے رہنما اور کارکنان بی جے پی کے خلاف احتجاج کیا۔ مظاہرین کا کہنا ہے کہ بی جے پی کی قیادت والی مرکزی حکومت سے جموں و کشمیر کو بہت نقصان پہنچا ہے۔ عام لوگوں نے بڑھ چڑھ کر حصہ لیا لیکن تاہم نیشنل کانفرنس کے صدر ڈاکٹر فاروق عبداللہ اور پی ڈی پی صدر محبوبہ مفتی احتجاجی مظاہرے میں نہیں پہنچی۔ ریاستی کانگریس صدر وقار رسول وانی، سینئر کانگریس لیڈر رمن بھلا اور دیگر پارٹیوں کے لیڈران اس احتجاج کا حصہ بنے۔ قابل ذکر ہے کہ تین اکتوبر کو فاروق عبداللہ کی قیادت میں جموں شہر میں اپوزیشن جماعتوں کی میٹنگ میں احتجاج کا فیصلہ کیا گیا تھا، تاہم آج کے اس احتجاجی میں فاروق اور محبوبہ کے نہ آنے سے الجھن کی صورت حال پیدا ہوگئی۔

اپوزیشن جماعتوں کا الزام ہے کہ بی جے پی حکومت زمینی سطح پر حالات کو جان رہی ہے اور اسی لیے وہ جان بوجھ کر انتخابات کو ملتوی کر رہی ہے۔ اب کارگل انتخابات کے نتائج سے ساری صورت حال واضح ہو گئی ہے۔ جموں و کشمیر کے شہریوں کو ایک مقبول منتخب حکومت سے محروم کیا جا رہا ہے۔ اگر حکومت مرکزی اور ریاستی سطح پر جموں و کشمیر میں حالات نارمل ہونے کا دعویٰ کر رہی ہے تو انتخابات کے وقت حالات کو خراب کیوں دکھایا جا رہا ہے۔ ان باتوں کا اظہار کانگریس کے سئنر لیڈر وقار رسول وانی نے کیا۔