جنوبی کشمیر میں سخت بندشیں

جنوبی کشمیر کے ضلع پلوامہ میں دو افراد کے کورونا وائرس میں مبتلا ہونے کے بعد سب ڈسٹرکٹ اونتی پورہ اور ترال سب ڈویژن میں آج زبردست بندشیں عائد کی گئی تھیں۔

سکیورٹی فورسز اور پولیس کی بھاری نفری کے علاوہ سیول انتظامیہ اور رضاکار نوجوانوں کی ایک بڑی تعداد سڑکوں پر لاک ڈاؤن کو مزید موثر بنانے کے لیے میدان عمل میں آ گئے تھے۔

سرینگر جموں قومی شاہراہ کے متصل گوری پورہ گاؤں کو بفر زون قراد دئیے جانے کے بعد علاقے کے لوگوں میں کورونا وائرس کے تعلق سے تشویش بڑھ گئی ہے اور انتظامیہ بھی عام لوگوں کے لیے ہنگامی اقدامات کر رہی ہے جبکہ لاک ڈاؤن کو مزید موثر بنانے کے لیے ڈرون کیمروں کا استعمال کیا جا رہا ہے۔

قومی شاہراہ اور پولیس اسٹیشن اونتی پورہ کے تحت آنے والے علاقوں میں 25 ناکے لگائے گیے ہیں اور ضروری پاس کے بغیر کسی کو آگے بڑھنے کی اجازت نہیں دی جا رہی ہے۔

ایس ایس پی اونتی پورہ طاہر سلیم نے میڈیا کو بتایا کہ موجودہ صورتحال کے مدنظر پولیس انتظامیہ لاک ڈاؤن کو کامیاب بنانے کے لیے ہنگامی اقدامات کر رہی ہے اور پولیس ڈسٹرکٹ اونتی پورہ کے تحت آنے والے علاقوں میں کسی کو بھی خلاف ورزی کرنے کی اجازت نہیں دی جا رہی ہے۔

ایس ایس پی نے مزید بتایا کہ لاک ڈاؤن کی خلاف ورزی کرنے پر اب تک ترال، اونتی پورہ، کھریو اور پانپور علاقوں سے اب تک 136 گاڑیوں کو ضبط کیا گیا ہے جبکہ 72 افراد کے خلاف کیس درج کیا گیا ہے۔

انھوں نے عوام سے اس نازک موقع پر احتیاط برتنے اور صحت کا پورا خیال رکھنے کی اپیل کی ہے۔