شراب کیلئے رقم نہ دینے پر ضعیف ماں کا قتل

شراب کیلئے رقم نہ دینے پر ایک بیٹے نے اپنی ضعیف ماں کا قتل کردیا۔یہ واردات تلنگانہ کے ضلع کومرم بھیم آصف آباد کی این ٹی آرکالونی میں پیش آئی۔

تلنگانہ میں ایک شرابی بیٹے نے شراب کے لیے پیسے نہ دینے پر اپنی ضعیفہ ماں کا قتل کردیا۔

پولیس نے بتایا کہ مقتول 60سالہ شنکراماں اسی علاقہ میں یومیہ اجرت پر کام کرتی تھی اور ملزم اس کا بڑا بیٹا39سالہ لنگنا ہے جو بے روزگار اور شرابی ہے۔

ہفتہ کی شب جب اس کے بیٹے نے شراب پینے کے لئے رقم دینے کا ماں سے مطالبہ کیا تو اس نے انکار کردیا جس پراس کے بیٹے نے بڑی لاٹھی سے ماں کی پٹائی کردی۔

خاتون کو زخمی حالت میں علاج کے لئے اسپتال منتقل کیا گیا جہاں علاج کے دوران اس کی موت ہوگئی۔

لنگنا حال ہی میں ضمانت پر جیل سے رہا ہوا تھا اور وہ شراب کے لئے اپنی ماں کو ہراساں کررہا تھا۔اس کی ہراسانی کی وجہ سے اس کی بیوی اس کوچھوڑ کر چلی گئی تھی جس کے بعد سے ہی وہ اپنی ماں کے ساتھ مقیم تھا۔

پولیس نے کہا کہ اس سلسلہ میں ایک معاملہ درج کرکے جانچ شروع کردی گئی۔