وادی میں تین دنوں بعد معمول کی زندگی بحال

ریاست جموں و کشمیر میں 'انصار غزوۃ الہند' نامی شدت پسند تنظیم کے بانی اور سربراہ ذاکر موسیٰ کی ہلاکت کے بعد وادی کشمیر میں تین روز بعد معمولات زندگی بحال ہوگئی ہے۔

جمعرات کو جب ذاکر موسیٰ کی ہلاکت کی خبر پھیلی تو کشمیر میں حالات کشیدہ ہو گئے۔ خبر سامنے آنے کے بعد سرکاری اور غیر سرکاری تقریبات کو ملتوی کر دیا گیا۔ حساس علاقوں میں سخت سکیورٹی انتظامات کیے گئے تھے۔

ذاکر موسیٰ کی ہلاکت کی خبر پھیلتے ہی وادی کے کئی اضلاع میں نوجوانوں اور سیکورٹی فورسز کے درمیان جھڑپوں کے واقعات پیش آئے۔

تمام دوکانیں، کاروباری اور تعلیمی ادارے بند کر دیے گئے۔ اس سلسلے میں آج تین روز کی ہڑتال کے بعد تمام دوکانیں اور کاروباری ادارے دوبارہ کھل گیے۔