پونچھ: گولہ باری میں مقامی خاتون ہلاک

گولہ باری کی وجہ سے عام زندگی مفلوج ہونے کے ساتھ ہی سرحدی آبادی میں ڈر و خوف کی لہر دوڑ گئی ہے۔

جموں وکشمیر کے سرحدی ضلع پونچھ کے مینڈھر اور بالاکوٹ سیکٹرز میں بھارت اور پاکستانی افواج کے مابین گولہ باری کا تبادلہ ہوا جس کی زد میں آنے سے 65سالہ خاتون ہلاک جبکہ ایک زخمی ہوئی ہے۔

پولیس ذرائع نے بتایا کہ پونچھ میں ایل او سی کے مینڈھر اور بالاکوٹ سیکٹرز میں پاکستانی فوج نے جنگ بندی معاہدے کی خلاف ورزی کرتے ہوئے بھارتی چوکیوں کو نشانہ بنا کر گولہ باری کی۔

انہوں نے کہا کہ وہاں تعینات بھارتی فوجی اہلکار حملے کا بھر پور جواب دے رہے ہیں تاہم پا کستانی فائرنگ کی زد میں آنے سے 65 سالہ ریشم بی زوجہ محمد اعظم ساکنہ لنجوٹ ہلاک ہوگئیں جبکہ حاکم بی زوجہ محمد شریف زخمی ہو ئی ہیں۔

دریں اثنا پونچھ میں ایل او سی کے نزدیک رہائش پذیر لوگوں کا کہنا ہے کہ فائرنگ سے انہیںک ئی طرح کی پریشانیوں کا سامنا کرنا پڑ رہا ہے۔

مقامی شہری محمد اقبال نے کہا: 'گزشتہ روز بھی فائرنگ ہوئی اور آج بھی اس کا سلسلہ جاری ہے۔ اس کی وجہ سے لوگوں میں دہشت و خوف کا ماحول ہے'۔

ان کا مزید کہنا تھا: 'ہماری مرکزی حکومت اور مقامی انتظامیہ سے اپیل ہے کہ ہمیں جلد از جلد بنکر بنا کر دیے جائیں۔ فائرنگ اچانک شروع ہوجاتی ہے۔ ایک جگہ سے دوسری جگہ منتقل ہونے کا موقع بھی نہیں ملتا'۔