ہماچل پردیش: 15 ہزار عارضی اساتذہ کو سپریم کورٹ سے راحت

سپریم کورٹ نے ہماچل پردیش کے 15 ہزار عارضی اساتذہ کو راحت دیتے ہوئے ان کی تقرریوں کو چیلنج کرنے والی عرضیوں کو خارج کر دیا ہے۔

جسٹس ایم ایم شانتانو گودر اور جسٹس آر سبھاش ریڈی پر مشتمل بینچ نے ہماچل پردیش ہائی کورٹ بینچ کے فیصلے کو برقرار رکھتے ہوئے چندر موہن نیگی اور دیگر کی اپیل خارج کر دی۔

قابل ذکر ہے کہ ہائی کورٹ کی سنگل بینچ نے چندر موہن نیگی اور دیگر کی درخواستوں کو نمٹاتے ہوئے سنہ 2001 سے سنہ 2003 کے درمیان کم از کم 15،000 پرائمری اسسٹنٹ اساتذہ (پی اے ٹی) اور پیرا ٹیچرس کی تقرریوں کو غیر قانونی قرار دیا تھا اور مرحلہ وار طریقے سے ان اساتذہ کو باہر کا راستہ دکھانے کی ریاستی حکومت کو ہدایت دی تھی۔

عارضی اساتذہ کی یونین نے ہائی کورٹ کے دو رکنی بینچ کے سامنے اس فیصلے کو چیلنج کیا تھا، جس نے سنگل بنچ کے فیصلے کو پلٹ دیا تھا۔ اس کے بعد دوبارہ چندرموہن نیگی اور دیگر نے اعلی عدالت کا دروازہ کھٹکھٹایا اور یہاں سے بھی انہیں مایوس ہونا پڑا۔