ہماچل پردیش: لینڈ سلائیڈنگ سے 9 سیاحوں کی موت

ریاست ہماچل پردیش کے ضلع کِننور کے بٹسیری گاؤں کی پہاڑیوں سے لینڈ سلائیڈنگ کے سبب 9 سیاحوں کی موت ہوگئی جبکہ پتھر گرنے کی وجہ سے گاؤں کو جوڑنے والا پُل بھی ٹوٹ گیا۔

ضلع کِننور کے پہاڑوں سے پتھر گرنے کی وجہ سے 9 لوگوں کے ہلاک ہونے کی اطلاع ہے جبکہ بٹسیری گاؤں کو جوڑنے والا پُل بھی ٹوٹ گیا نیز نیچے کھڑی گاڑیوں کا بڑے پیمانے پر نقصان ہوا ہے۔

سانگلا پولیس تھانہ کے مطابق بٹسیری کی پہاڑیوں سے چٹانیں گرنے کا سلسلہ جاری ہے ایسے میں اس حادثے میں کتنے لوگوں کی جان گئی یہ کہنا مشکل ہے لیکن ابتدائی معلومات کے مطابق 9 لوگ ہلاک ہوئے ہیں۔

واضح رہے کہ گزشتہ روز بھی چٹان گرنے سے یہاں کے سیب کے باغ اور آس پاس کے علاقے میں کافی نقصان ہوا تھا اور آج بھی اسی جگہ لینڈ سلائیڈنگ سے جانی و مالی نقصان ہوا ہے۔