ریاست ہماچل پردیش کے کننور اور لاہول-اسپیتی اضلاع میں الرٹ کر دیا گیا ہے تاکہ سکیورٹی کو یقینی بنانے کے لیے تمام احتیاطی اقدامات اٹھائے جائیں۔
مرکز کے زیر انتظام لداخ کے گلوان وادی میں بھارتی افواج اور چینی پیپلز لبریشن آرمی فورسز کے درمیان پرتشدد تناؤ کے بعد ہماچل پردیش انتظامیہ کو ہائی الرٹ کردیا گیا ہے۔
اطلاعات کے مطابق، چین سے متصل کننور اور لاہول اسپیتی اضلاع کو ایک الرٹ جاری کیا گیا ہے تاکہ مقامی آبادی کی حفاظت کو یقینی بنایا جاسکے ۔
ریاستی پولیس کے ترجمان خوشال شرما نے کہا کہ' اس سلسلے میں تمام ریاستی انٹیلی جنس یونٹز کو بھی الرٹ کردیا گیا ہے۔
ذرائع نے ای ٹی وی بھارت کو بتایا کہ 'چین سے متصل کننور کے قریب 14 دیہاتوں میں لوگوں سے کہا گیا ہے کہ وہ سرحدی علاقوں کی طرف جانے سے پرہیز کریں ۔ ان دیہات میں بھارتی فوج کے عہدیداروں کی جانب سے فوج کی گاڑیوں کی نقل و حرکت اور کئی دیگر سرگرمیاں جاری ہے۔'
واضح رہے کہ گذشتہ کئی دنوں سے لداخ کے گلوان وادی میں دونوں ممالک کی فوجیں آمنے سامنے کھڑی ہیں۔ دوسری جانب فوجی اعلی سطح پربات چیت کے ذریعہ کشیدگی دور کرنے کی کوششیں بھی کی جارہی ہیں۔
فوجی ذرائع کا کہنا ہے کہ لداخ میں بھارت چین کے درمیان کشیدگی کے مابین بھارتی فوج کے 20 جوان ہلاک ہوئے ہیں، جبکہ ہلاکتوں کی تعداد میں مزید اضافہ ہو سکتا ہے۔