سوراج انڈیا کے قومی صدر یوگیندر یادو آج ہریانہ کے میوات میں اناج منڈیوں کا دورہ کرنے پہنچے۔ انہوں نے میوات کے کسانوں سے روبرو ہو کر فصل کی خرید سے متعلق ان کے مسائل کو سنا۔ اس کے بعد پریس کانفرنس سے خطاب کرتے ہوئے کہا کہ ریاست میں نوح میوات کے کسانوں کی حالت سب سے خراب ہے۔
یوگیندر یادو نے تاؤڈو اور نوح اناج منڈیوں کا دورہ کرنے کے بعد ایس ڈی ایم پردیپ اہلاوت سے کسانوں کے مسائل کے حوالے سے ملاقات کی۔ انہوں نے کہا کہ کسانوں کے ساتھ سرعام لوٹ ہو رہی ہے۔ حکومت نے باجرے کی فصل کا 2150 ایم ایس پی طے کیا ہے۔ لیکن زمینی حقیقت یہ ہے کہ کسان کو اس کی اصل قیمت ہی نہیں مل رہی ہے۔دھان، پرمل، کپاس کی حالت بھی یہی ہے۔
حکومت کے نمائندے اعلان کرتے ہیں کہ کسان کا دانہ دانہ خریدا جائے گا لیکن سرکار 25 فیصد ہی خرید کرتی ہے۔ انہوں نے کہا کہ کسانوں نے اب سرسا میں پکا مورچہ کھڑا کر دیا ہے اور سابق وزیر اعلی دیوی لال کے وارث نائب وزیر اعلی دشینت چوٹالہ کو انتباہ دیا ہے کہ یا تو آپ کرسی سنبھالیں یا تاؤ دیوی لال کا نام لینا بند کر دیں، یا پھر کسانوں کے ساتھ کھڑے ہو جائیں۔
