ہریانہ کے ضلع سرسا میں آج کسانوں نے تینوں زرعی قوانین کے خلاف ریلائنس شوروم کے باہر جم کر احتجاج کیا اور شو روم مالکان کو کل سے شوروم بند رکھنے کا الٹی میٹم بھی دیا۔
اطلاعات کے مطابق ملک میں 15 مارچ کو کارپوریٹ ڈے کے طور پر منایا جاتا ہے اس دوران آج یوم کارپوریٹ ڈے کے موقع پر سرسا بینک اور ریلوے کے ملازمین نے زرعی قوانین کے خلاف سرسا میں واقع ریلائنس شوروم کے سامنے جم کر احتجاج کیا۔
احتجاج کے دوران کسانوں نے کہا کہ حکومت جب تک زرعی قوانین کو منسوخ نہیں کرتی ریلائنس کے تمام شوروم بند رہیں گے۔
اس موقع پر کسان رہنما گرپریت نے کہا کہ 'ملک کے تمام کارپوریٹ ہاؤسز حکومت کے حمائتی ہیں۔ جو حکومت کی فلاح و بہبود کے لئے کام کرتے ہیں۔
کسانوں نے کہا کہ آج ہم سب نے فیصلہ کیا ہے کہ جب تک تینوں زرعی قوانین کو منسوخ نہیں کیا جاتا ہے اور ایم ایس سی سے متعلق گارنٹی قانون نہیں بنایا جاتا ہے، ریلائنس کے تمام شوروم بند رہیں گے۔
انہوں نے بتایا کہ ہم نے شو روم کے مالکان کو بھی الٹی میٹم دے دیا ہے کہ کل سے آپ شوروم بند رکھیں گے جب تک تینوں زرعی قوانین کو منسوخ نہیں کیا جاتا ہے۔ اگر اس کے باوجود بھی شوروم کھلتا ہے تو دوسرا راستہ اختیار کیا جائے گا۔
