چرخی دادری میں احتجاجی انسٹرکٹز اور پولیس میں جھڑپ

ہریانہ کے چرخی دادری میں گذشتہ روز پولیس اور فزیکل ٹریننگ انسٹرکٹر کے مابین جھڑپ ہوگئی جبکہ انسٹرکٹرز نائب وزیراعلیٰ دشینت چوٹالہ سے ملاقات کےلیے محکمہ پبلک ورکس کی بلڈنگ میں داخل ہونا چاہتے تھے۔

فزیکل ٹریننگ انسٹرکٹر نائب وزیراعلیٰ کو ایک میمورنڈم حوالہ کرنا چاہتے تھے جس کےلیے وہ محکمہ پبلک ورکس کی عمارت میں داخل ہونے کی کوشش کر رہے تھے کہ پولیس نے انہیں پیچھے ڈھکیل دیا جس کے بعد پولیس اور انسٹرکٹرز میں جھڑپ ہوگئی۔

اس موقع پر انسٹرکٹرز احتجاج کرنے لگے اور دشینت چوٹالہ کے خلاف نعرے بلند کئے۔ جھڑپ اس وقت ہوئی جب نائب وزیراعلیٰ اپنے دادا و سابق نائب وزیراعظم دیوی لال چوٹالا کی 107 سالگرہ تقاریب میں شرکت کرنے کےلیے یہاں پہنچے تھے۔

انسٹرکٹرز نے بتایا کہ ’ہم نے ملازمت کی بحالی کےلیے پرامن انداز میں احتجاج کیا لیکن پولیس نے لاٹھی چارج کردیا، ہم صرف چوٹالہ سے ملنا چاہتے تھے اور حکومت سے مدد کا مطالبہ کررہے تھے‘۔

ایک احتجاجی سنیل کماری نے کہا کہ ’اگر نائب وزیراعلیٰ ہماری مدد نہیں کریں گے تو ہم اپنا احتجاج جاری رکھیں گے‘۔