کل ہند قرآن کریم کے مسابقہ میں محمد فہیم اول

تلاوت قرآن پاک کے کل ہند مسابقہ میں اول مقام حاصل کرنے والے طالب علم کو آل انڈیا امامس کونسل ہریانہ کی جانب سے اعزاز سے نوازا گیا۔

گزشتہ ماہ انڈیا اسلامک کلچرل سینٹر دہلی اور ایران کلچر ہاؤس کے زیر اہتمام کل ہند مسابقہ منعقد کیا گیا تھا جس میں ریاست ہریانہ کے خطے میوات کے رہنے والے محمد فہیم بن شبیر نے اول مقام حاصل کیا۔

اس حوالے سے مولانا احمد ندوی نے ای ٹی وی بھارت کو بتایا کہ ان کے بھتیجے محمد فہیم نے قرأت میں پہلی پوزیشن حاصل کی ہے جبکہ حدر میں میوات کے کُہُکبان گاؤں کے رہنے والے محمد خالد نے پہلی پوزیشن حاصل کی ہے اور کل ملا کر میوات سے چار طلبا نے پوزیشن حاصل کی ہیں۔

محمد فہیم کے والد قاری شبیر احمد نے بتایا کہ 'ہمیں بے انتہا خوشی ہے کہ میرے بچے نے ملکی سطح پر قرآن مقدس کی تلاوت میں پہلی پوزیشن حاصل کی ہے'۔

آل انڈیا امامس کونسل ہریانہ کے صدر مفتی تعریف سلیم ندوی نے کہا کہ 'یہ فخر کی بات ہے کہ محمد فہیم نے یہ کامیابی حاصل کی۔ اب نمایاں کارکردگی کا مظاہرہ کرنے والے طلبا کو بین الاقوامی سطح پر ایران میں منعقد ہونے والے مسابقہ میں حصہ لینے کا موقع ملے گا'۔