حج 2020: کینسلیشن فارم کے اجرا سے عازمین حج مایوس

سن 2020 میں حج کے مقدس سفر پر جانے والے عازمین کی جانب سے حج کی تیاریاں تقریباً مکمل کرلی گئی تھیں لیکن دنیا میں کورونا وائرس نے دستک دی اور ساری تیاریوں پر پانی پھر گیا۔

حج کی تیاریوں میں پیش پیش رہنے والے رضاکار حاجی عثمان بھادس نے ای ٹی وی بھارت سے بات کرتے ہوئے کہا کہ سب کچھ معمول کے مطابق ہی تھا لیکن عالمی وبا کے چلتے اب شاید امسال سفر حج ممکن نہیں ہے۔ سعودی حکومت صحت کے معاملے میں کوئی خطرہ مول نہیں لے سکتی اس لیے ایسا لگتا ہے کہ بہت کم لوگ ہی سفر حج پر روانہ ہوں گے۔

انہوں نے کہا کہ عازمین حج شاید رقم واپسی کے لیے کینسلیشن فارم بھرنے میں دلچسپی نہیں لیں گے وہ آخر تک امید رکھیں گے۔

اس مرتبہ وزارت خارجہ کی جانب سے حاجیوں کی خدمت کے لیے ماسٹر شفیع محمد جانے والے تھے لیکن وہ بھی شاید اب نہ جا سکیں انہیں ابھی اس خبر سے کافی دکھ پہنچا ہے۔

انہوں نے شعر پڑھتے ہوئے کہا کہ منزل ملے نہ ملے مجھے اس کا غم نہیں، منزل کی جستجو میں میرا کارواں تو ہے۔ انہوں نے کہا کہ ہمیں پھر بھی امید ہے کچھ لوگ تو ضرور سفر حج پر جائیں گے۔