آج نوح سے رکن اسمبلی آفتاب احمد نے اس معاملے کے متعلق ہریانہ کے وزیر اعلی کو خط لکھ کر دکھ کا اظہار کیا ہے اور اپیل کی ہے کہ میوات کی شبیہ خراب کرنے والوں پر سخت کارروائی کی جائے۔
رکن اسمبلی اور ڈپٹی اپوزیشن لیڈر آفتاب احمد نے ہریانہ کے وزیر اعلی منوہر لال کھٹر کو خط لکھ کر کہا ہے کہ گزشتہ ایک مہینے سے میوات کی شبیہ کو کچھ بی جے پی رہنماؤں ، بی جے پی سے جڑی تنظیموں کے رہنماؤں ، غلط خبریں لکھنے والے کچھ صحافیوں ، سدرشن نیوز چینل سمیت کچھ لوگ خراب کرنے کی کوشش کر رہے ہیں۔
یہ لوگ میوات کی گنگا جمنی تہذیب پر بار بار حملہ کر رہے ہیں اور ایسی خبریں پھیلا کر افواہیں پھیلا رہے ہیں جو ایک سازش کا حصہ لگتی ہیں۔ان پر فوری طور پر کارروائی کی جائے۔
غور طلب ہے کی اسی معاملے میں 16 مئی 2020 کو میوات کے دیگر دونوں رکن اسمبلی چوہدری محمد الیاس اور مامن خان انجینئر کے ساتھ بھی وہ میٹنگ کر چکے ہیں۔ تب بھی انہوں نے سوشل میڈیا پر ایک ویڈیو جاری کرکے یہ بات کہی تھی کہ میوات کا بھائی چارہ بے حد مضبوط ہے۔
میوات کے متعلق یہ معاملہ مسلسل طول پکڑتا جا رہا ہے۔اسی معاملے کو لے کر آج رکن اسمبلی نوح نے وزیر اعلیٰ کو خط لکھ کر میوات کی شبیہ کو خراب کرنے والوں پر سخت کاروائی کا مطالبہ کیا ہے۔