گجرات: سڑک حادثہ میں 6 ہلاک، درجنوں زخمی

گجرات کے اراولی ضلع کے مالاپور شہر کے نزدیک واتر ندی پر بنے پل پر ہوئے سڑک حادثے میں ایک خاتون سمیت چھ لوگوں کی موت ہوگئی اور 23 دیگر زخمی ہوگئے۔

پولس نے بتایا کہ بیلیو گاؤں سے شادی کی ایک تقریب میں حصہ لینے کے لئے کل رات ٹریکٹر ٹرالی میں سوار ہوکر ایک خاندان کے 30 سے زیادہ لوگ مہیاپور گاؤں جارہے تھے۔

اس دوران رات تقریبا 9 بجے ایک تیز رفتار ڈمپر نے پل پر ان کی گاڑی کو پیچھے سے ٹکر ماردی۔ اس پر سوار پانچ لوگ ندی میں گرگئے جن کی لاشیں آج صبح نکال لی گئیں۔ 24 زخمیوں میں سے ایک خاتون نے علاج کے دوران دم توڑ دیا۔ بچاؤ کا کام دیر رات شروع ہوا تھا۔

ٹریکٹر ٹرالی نے پل کے کنارے کو توڑ دیا تھا پر یہ نیچے نہیں گری تھی۔ زخمیوں کو موڈاسا اور ہمت نگر کے مختلف اسپتالوں میں بھرتی کرایا گیا ہے۔