Gujarat Board 12th Result شیخ یاسمین بانو عظمت علی نے ہندی میڈیم سے 99.88 پرسنٹائل حاصل کیا

گجرات میں آج بارہویں جماعت کے نتائج کا اعلان کیا گیا، جس میں احمدآباد کے گومتی پور علاقے میں رہنے والے سلائی کا کام کرنے والے کی بیٹی شیخ یاسمین بانو بنت عظمت علی نے ہندی میڈیم سے 99.88 پرسنٹائل لاکر پورے گجرات میں اپنا نام روشن کیا ہے۔

احمدآباد: ریاست گجرات کےاحمدآباد میں سلائی کا کام کرنے والے کی بیٹی شیخ یاسمین بانو عظمت علی نے ہندی میڈیم سے 99.88 پرسنٹائل حاصل کرتے ہوئے ریاست کا نام روشن کیا۔ اس تعلق سے یاسمین بانو سے ای ٹی وی بھارت نمائندہ روشن آرا نے ایکسکلوژیو بات چیت کی۔ اس دوران یاسمین بانو نے بتایا کہ میں نے سیٹھ سی ایل ہندی ہائی اسکول احمدآباد سے بارہویں تک کی تعلیم حاصل کی ہے۔ میرا رزلٹ 99.88 پرسنٹائل اور 92% حاصل ہوئے ہیں میں پجاری کی چال گومتی پور میں رہتی ہوں اور میرے پاپا ٹیلر ہیں۔ سلائی کام گھر پر ہی کرتے ہیں۔ میرے پانچ بھائی بہن ہیں۔ سب کو میرے والد اچھی تعلیم و تربیت دے رہے ہیں۔

شیخ یاسمین بانو عظمت علی نے ہندی میڈیم سے 99.88 پرسنٹائل حاصل کیا

شیخ یاسمین بانو نے مزید کہا کہ ہم غریب ہیں لیکن پڑھائی میں امیر ہیں۔ ہمیں بچپن سے پڑھائی کا کافی شوق تھا اور ہندی میڈیم میں ہی میرا ایڈمیشن ہوا اس کے باوجود میں نے ہر طرح سے محنت کی۔ میں ہندی کو زندہ رکھنا چاہتی ہوں اور اب میں گریجویشن کرکے یو پی ایس سی کی تیاری کرتے ہوئے یوپی ایس سی میں کامیاب ہونا چاہتی ہوں۔ میں نے یو پی ایس سی کلیئر کرنے کا گول بنا لیا ہے۔ اس کے لیے میں ہر طرح سے محنت کرنے میں ابھی سے مصروف ہو گئی ہوں۔ وہیں یاسمین بانو کے والد عظمت علی نے بتایا کہ آج میں بہت خوش ہوں۔ میری بچی نے اتنا بہترین رزلٹ حاصل کیا ہے۔ ہم اس کے لیے ہر طرح سے محنت کرتے ہیں۔

عظمت علی نے مزید کہا کہ میں اپنے گھر میں ہی سلائی کام کرتا ہوں۔ اس کے باوجود میں اپنے بچوں کو اچھی سے اچھی تعلیم دینا چاہتا ہوں۔ میں مہینے میں 15 ہزار روپے محنت کرکے کما لیتا ہوں۔ کبھی کم کبھی زیادہ لیکن اپنے بچوں کے لیے پورا دن رات محنت کرتا رہتا ہوں۔ تاکہ انہیں ایسا دن نہ دیکھنا پڑے کہ وہ بے یار ومددگار ہوجائیں۔ میں انہیں دینی اور دنیاوی تعلیم بھی دے رہا ہوں اور سماج میں اچھا بنانے کی ہر ممکن کوشش کر رہا ہوں۔ اب میری بچی یو پی ایس سی کرنا چاہتی ہے۔ اس کے لیے بھی میں ہر طرح سے تیار ہوں اور مجھے پورا یقین ہے کہ وہ یو پی ایس سی کلیئر کرے گی اور ایک بڑی آفیسر بنے گی۔ یہ میرے لیے کافی فخر کی بات ہوگی۔