All India Primary Teacher's Federation اسکولوں کا یوم تاسیس ضرور منایا جائے، مودی

آل انڈیا پرائمری ٹیچرس ایسوسی ایشن کے 29ویں دو سالہ کنونشن میں وزیر اعظم نریندر مودی نے کہا کہ اسکولوں کا بھی یوم تاسیس منایا جانا چاہئے، جس سے تعلق کی ایک نئی شروعات ہوگی اور رابطے میں اضافہ ہوگا۔

گاندھی نگر: وزیر اعظم نریندر مودی نے جمعہ کو کہا کہ اسکولوں کا بھی یوم تاسیس منایا جانا چاہئے، جس سے تعلق کی ایک نئی شروعات ہوگی اور رابطے میں اضافہ ہوگا۔مودی نے آل انڈیا پرائمری ٹیچرس ایسوسی ایشن کے 29ویں دو سالہ کنونشن ’’اکھل بھارتیہ شکشا سنگھ ادھیوشن‘‘ میں کہا کہ ہر اسکول کو اپنا یوم تاسیس منانا چاہیے۔ ہندوستان 21ویں صدی کی جدید ضرورتوں کے مطابق نئے نظام بنا رہا ہے۔ معاشرے میں ایسا ماحول پیدا کرنے کی ضرورت ہے جس میں لوگ رضاکارانہ طور پر استاد بننے کے لیے آگے آئیں۔

انہوں نے کہا کہ قومی تعلیمی پالیسی مادری زبان میں تعلیم کو فروغ دیتی ہے۔ یہ نئی قومی تعلیمی پالیسی اسی بات کو مدنظر رکھتے ہوئے بنائی گئی ہے۔ انہوں نے کہا کہ چھوٹے بچوں کے لیے استاد خاندان سے باہر پہلا فرد ہوتا ہے جس کے ساتھ وہ زیادہ سے زیادہ وقت گزارتے ہیں۔ اس لیے تمام اساتذہ میں اس ذمہ داری کا احساس ہندوستان کی آنے والی نسلوں کو بہت مضبوط کرے گا۔ ٹیکنالوجی معلومات فراہم کر سکتی ہے، لیکن صحیح نقطہ نظر نہیں۔ آج کی نسل کے طلباء کا تجسس ایک نیا چیلنج لے کر آیا ہے۔ یہ طلباء اعتماد سے بھرپور ہیں۔ وہ بے خوف ہیں۔ ان کی فطرت استاد کو روایتی طریقہ تدریس سے باہر نکلنے کا چیلنج دیتی ہے۔

مودی نے کہا کہ گجرات میں اساتذہ کے ساتھ ان کے جو تجربے رہے، اس نے قومی سطح پر بھی پالیسیاں بنانے میں ان کی بہت مدد کی ہے۔ مودی نے گجرات اسٹیٹ پرائمری ٹیچرس ایسوسی ایشن کے زیر اہتمام منعقدہ کانفرنس کے دوسرے دن تعلیمی نمائش کا بھی معائنہ کیا۔ اس نمائش میں 2001 سے 2014 تک گجرات کے وزیر اعلیٰ کی حیثیت سے ان کے دور میں تعلیمی شعبے میں انقلابی تبدیلی لانے کے لیے کیے گئے کام کاج اور ریاست میں تعلیم کی سطح کو بلند کرنے کے لیے کیے گئے اقدامات کی یادگاری تصویر کی نمائش کی گئی۔ ان میں ان کی طرف سے اس وقت تعلیم کے میدان میں کئے گئے ودیالیہ پرویشوتسو، گنوتسو، کنیا کیلوانی (تعلیم) رتھ یاترا جیسے کچھ اقدامات شامل ہیں۔

یواین آئی