'میں کانگریس میں ہی رہوں گا'

بھارتی ریاست گجرات کے سیاسی گلیاروں میں گذشتہ روز یہ افواہ گشت کرتی رہی کہ کانگریس کے او بی سی رکن اسمبلی الپیش ٹھاکر کسی بھی وقت استعفیٰ دے کر بی جے پی میں شامل ہو سکتے ہیں۔

لیکن اب ان افواہوں پر الپیش ٹھاکر نے روک لگا دی ہے۔

الپیش نے ان افواہوں کو خارج کرتے ہوئے کہا کہ 'وہ ابھی کانگریس میں ہی ہیں اور آگے بھی رہیں گے۔

واضح رہے کہ کانگریس کے دو رکن اسمبلی جمعہ کو پارٹی سے استعفیٰ دے چکے ہیں اور ان میں سے ایک حکمراں پارٹی میں شامل ہو گئے ہیں۔

الپیش ٹھاکر نے کہا کہ 'میں ابھی اپنے لوگوں کے لیے مسلسل لڑتا رہوں گا۔ میں کانگریس میں ہی رہوں گا اور مسلسل کانگریس کی حمایت کرتا رہوں گا۔'

واضح رہے کہ الپیش سنہ 2017 کے اسمبلی انتخابات کے دوران کانگریس میں شامل ہوئے تھے اور ہاردک پٹیل اور جگنیش میوانی کی نوجوان جوڑی کا حصہ تھے۔

قبل ازیں یہ چہ میگوئیاں تھیں کہ بی جے پی انہیں وزیر کا عہدہ یا پھر لوک سبھا کا ٹکٹ دی سکتی ہے۔