گجرات :کورونا وائرس کے کیسز میں کمی

ریاست گجرات میں نئے کورونا وائرس کے کیسز کی تعداد میں کمی درج کی گئی ہے۔وہیں گزشتہ 24 گھنٹے کے دوران ریاست میں کورونا کے 451 نئے معاملے سامنے آئے ہیں۔

گجرات میں کورونا وائرس کے نئے معاملے اور ہلاک ہونے والوں کی تعداد میں مسلسل گراوٹ درج کی جارہی ہے، اس کے ساتھ ہی کورونا سے صحتیاب ہوکر اسپتال سے ڈسچارج ہونے والے مریضوں کی تعداد میں بہت تیزی سے اضافہ ہوتا نظر آرہا ہے۔

کورونا وائرس سے اب تک گجرات میں 4300سے زائد افراد ہلاک ہو چکے ہیں،گجرات میں اب تک کورونا سے مرنے والوں کی کل تعداد 4374 پہنچ گئی ہے۔گجرات میں گزشتہ 24 گھنٹوں کے دوران 2 افراد ہلاک ہوئے ہیں، وہیں 24 گھنٹوں کے دوران گجرات میں کورونا وائرس کے 451 نئے معاملے سامنے آئے ہیں۔

گجرات میں اب تک کل دو لاکھ 58 ہزار 262 مثبت معاملے سامنے آئے ہیں، جبکہ گجرات میں کورونا کو شکست دے کر اپنے گھر جانے والوں کی کل تعداد 2 لاکھ 48 ہزار 650 پہنچ گئی ہے، تاہم گزشتہ 24 گھنٹوں کے دوران 700 افراد کو اسپتال سے ڈسچارج کیا گیا ہے۔

واضح رہے کہ موجودہ وقت میں گجرات میں 5240 معاملے ایکٹیو ہے ان میں سے 51 مریض وینٹی لیٹر پر ہیں، وہیں 5189 افراد کی حالت مستحکم ہے۔

محکمہ صحت گجرات کے مطابق گزشتہ 24گھنٹوں میں احمدآباد میں88، سورت میں 78، وڈودرا میں 69، گاندھی نگر میں 6، بھاونگر میں 2، بناس کانٹھامیں 2، راجکوٹ میں 36، سریندر نگر میں 1، پاٹن میں0، امریلی میں 5، جام نگر میں 5، مہسانہ میں 4، کچھ میں 15 کورونا وائرس کے نئے معاملے درج ہوئے ہیں۔