ایک کروڑ کی جعلی کرنسی کے ساتھ پانچ افراد گرفتار

گجرات کرائم برانچ نے سورت میں جعلی کرنسی کے ساتھ پانچ افراد کو گرفتار کیا ہے، جن کی شناخت پرتیک ،پروین چوپڑا،کدو چوپڑا،موہن مادھو،اور رادھا رمن سوامی کے طور پر کی گئی ہے۔

گجرات کرائم برانچ نے بڑی کاروائی کرتے ہوئے سورت شہرمیں ایک کروڑ چار لاکھ روپئے کی بھارتی جعلی کرنسی کے ساتھ پانچ افراد کو گرفتار کیا ہے۔
پولیس کا کہنا ہے کہ مکمل معلومات کے بعد انھوں نے پرتیک کو گرفتار کیا ہے، جس کے پاس سے چار لاکھ روپئے کی جعلی کرنسی برآمد کی گئی ہے۔اس سلسلہ میں پوچھ گچھ کےدوران پرتیک نے بتایا کے اس کے ساتھ کچھ اور لوگ بھی ہیں جو اس کام میں اس کی مدد کرتے ہیں۔

پرتیک سے لی گئی معلومات کی بنیاد پر مزید چار افراد کو گرفتار کیا گیا جن کے پاس سے ایک کروڑ روپئے کی جعلی کرنسی برآمد ہوئی۔

ڈپٹی کمشنر کرائم برانچ راہل پٹیل کے مطابق یہ تمام افراد کھیڈا گاؤں میں جعلی کرنسی چھاپ رہے تھے۔

پولیس کا کہنا ہے کہ پروین پیشہ ور مجرم ہے اور اس پر پہلے سے ہی سات سے آٹھ مقدمے چل رہے ہیں۔