عائشہ کے شوہر کو احمدآباد کی میٹرو پولیٹن کورٹ میں پیش کیا گیا

عائشہ خود کشی معاملہ میں عائشہ کے شوہر کو گجرات پولیس نے پالی سے گرفتار کیا تھا، جسے آج احمدآباد کی میٹرو پولیٹن کورٹ میں پیش کیا گیا ہے۔

گجرات کے شہر احمدآباد سے تعلق رکھنے والی عائشہ نے 25 فروری کو سابرمتی ندی میں کود کر خود کشی کر لی تھی۔ عائشہ نے خود کشی کرنے سے پہلے ایک ویڈیو بنا کر اپنے شوہر کو بھیجا تھا، جو سوشل میڈیا میں خوب وائرل ہوا۔

عائشہ کے شوہر کو گجرات پولیس نے پالی سے گرفتار کیا تھا۔ اسے آج میٹرو پولیٹن کورٹ میں پیش کیا گیا۔ عائشہ کا شوہر عارف ولد بابو خان ​​پالی میں اندرا کالونی کے علاقہ میں اپنی بہن کے گھر میں چھپا ہوا تھا۔ اس کی اطلاع گجرات پولیس کو ملی تو انہوں نے ٹرانسپورٹ پولیس کو اطلاع دی اور پیر کی دیر رات کو عارف کو مقامی پولیس نے گرفتار کیا۔

ٹرانسپورٹ نگر تھانہ پولیس سے ملی جانکاری کے مطابق بیوی کو پریشان کرنے اور خود کشی کے لیے اکسانے کے معاملہ میں گجرات پولیس عائشہ کے شوہر عارف کو تلاش کرنے کے لیے پالی آئی تھی۔

اس کے ٹرانسپورٹ نگر تھانہ علاقہ کے اندرا کالونی میں ہونے کی اطلاع پر پولیس نے ٹرانسپورٹ نگر تھانہ پولیس سے رابطہ کیا، جس پر ٹرانسپورٹ نگر تھانہ پولیس نے عارف کو اس کے بہن کے یہاں سے گرفتار کیا۔

اس تعلق سے سابرمتی ریور فرنٹ ویسٹ پولیس کے انسپکٹر وی ایم دیسائی نے بتایا تھا کہ عارف خان کو پالی سے گرفتار کیا گیا۔ اس سے قبل پولیس کی ایک ٹیم بھی جالور میں واقع عارف کے گھر گئی تھی لیکن وہ وہاں نہیں تھا۔

عارف فرار تھا، اس لیے ٹیکنالوجی کی مدد سے ملزم کو پیر کی رات پالی سے گرفتار کیا گیا۔ اب اسے ٹرانزٹ ریمانڈ کے ذریعہ احمد آباد لایا گیا ہے آج عارف کو میٹرو پولیٹن کورٹ میں پیش کیا گیا۔