کیا آپ نے میرے بھائی کو دیکھا ہے؟

ایک جانب لاک ڈاؤن کی وجہ سے لوگ دو وقت کی روزی کے لیے در بدر بھٹک رہے ہیں تو دوسرے جانب احمدآباد میں ایک ایسا شخص بھی ہے جو کھانا نہیں بلکہ اپنے گمشدہ بھائی کی تلاش میں در بدر بھٹک رہا ہے اور وہ ہر کسی سے پوچھ رہا ہے، کیا آپ نے میرے بھائی کو دیکھا ہے؟

گجرات میں احمدآباد کے گومتی پور علاقے کے رہنے والے سرفراز اپنے گمشدہ بھائی کو ڈھونڈنے کے لیے در بدر بھٹک رہے ہیں ان کی زبان پر صرف دو ہی جملے ہیں اور ہر شخص سے پوچھ رہے ہیں کہ کیا میرے بھائی کو آپ نے دیکھا ہے؟ اگر میرا بھائی آپ کو نظر آئے تو مجھ سے رابطہ کریں۔

ای ٹی وی بھارت کی نمائندہ نے جب بھائی کی تصویر لیے در در بھٹکتے سرفراز کو دیکھا اور وجہ پوچھی تو انہوں نے کہا کہ اس کے بھائی کا نام امتیاز ہے اور عمر 50 سال جو گزشتہ 20 دن سے گمشدہ ہے وہ دماغی طور پر کمزور تھے، اس بارے میں پولس اسٹیشن میں شکایت بھی درج کروائی گئی ہے۔

گمشدہ بھائی کی تلاش

انہوں نے مزید کہا کہ 'میرے بھائی بیس روز قبل صبح ناشتہ کر کے گھر سے باہر نکلے اور تب گھر واپس لوٹ کر نہیں آئے، ہم نے ان کا کافی انتظار کیا پھر تلاش شروع کی لیکن اب تک کہیں پتا نہیں چلا۔

سرفراز نے افسردہ لہجے میں کہا کہ 'لاک ڈاؤن کی وجہ سے ہم بہت دور نہیں جا پا رہے ہیں ایسے میں اگر کسی کو میرا بھائی نظر آئے تو ہم سے را بطہ کریں۔