پولیس ذرائع نے بتایا کہ وسطی کشمیر کے ضلع گاندربل کے ننار علاقے میں عسکریت پسندوں نے بی جے پی کارکُن کے گھر پر حملہ کیا، حملے میں ایک نامعلوم عسکریت پسند ہلاک ہو گیا ہے۔ حملے میں بی بے پی کارکن کا محافظ زخمی ہو گیا۔
ذرائع نے بتایا کہ زخمی شدہ پولیس اہلکار کو فوری طور پر ہسپتال منتقل کیا گیا، جہاں وہ زخموں کی تاب نہ لاکر دم توڑ بیٹھا۔
قبل ازیں کشمیر زون پولیس نے اپنے ٹویٹر ہینڈل پر ٹویٹ کرتے ہوئے کہا کہ عسکریت پسندوں نے گاندربل کے ننار علاقے میں بی جے پی کے ایک کارکن پر فائرنگ کی۔ تاہم وہ محفوظ ہیں۔ تاہم واقعے میں ان کا ایک پی ایس او زخمی ہو گیا۔ پی ایس او کی جوابی کارروائی میں ایک نامعلوم عسکریت پسند ہلاک ہوگیا۔
ذرائع نے بتایا کہ عسکریت پسندوں نے ننار علاقے میں غلام قادر نامی بی جے پی کارکن کے گھر پر حملہ کیا، لیکن پی ایس او کی بروقت جوابی فائرنگ کے نتیجے میں ایک عسکریت پسند ہلاک ہوگیا۔ حملے میں پی ایس او زخمی ہو گیا، انہیں فوری طور پر ہسپتال منتقل کیا گیا، جہاں وہ زخموں کی تاب نہ لاکر دم توڑ بیٹھا۔