سرینگر: الطاف حسین اپنے آبائی گاؤں میں سپرد خاک

مرحوم پولیس اہلکار کے پسماندگان میں والدین اور اہلیہ کے علاوہ 18 ماہ کا بیٹا حسنین شامل ہیں۔

وسطی کشمیر کے ضلع گاندربل میں منگل کی شام بی جے پی کارکن پر حملے کے دوران مارے جانے والے پولیس اہلکار الطاف حسین کو بدھ کے روز اپنے آبائی قبرستان واقع گاندر پورہ عیدگاہ میں سپرد خاک کیا گیا۔

مرحوم پولیس اہلکار کے جلوس جنازے میں بڑی تعداد میں لوگوں نے شرکت کی اور اشک بار آنکھوں کے ساتھ انہیں سپرد لحد کیا گیا۔

مرحوم پولیس اہلکار کے پسماندگان میں والدین اور اہلیہ کے علاوہ 18 ماہ کا بیٹا حسنین شامل ہیں۔

قبل ازیں ضلع پولیس لائنز سری نگر میں پولیس کنٹرول لائنز سری نگر میں بدھ کی صبح مہلوک پولیس اہلکار الطاف حسین کی میت پر پھول مالائیں چڑھانے کی تقریب منعقد کی گئی۔

تقریب میں پولیس و سیکورٹی فورسز کے سینئر افسروں نے شرکت کر کے مہلوک پولیس اہلکار کو شاندار خراج عقیدت ادا کیا۔

اس موقع پر انہوں نے میڈیا کو بتایا کہ ہمیں اپنے پولیس جوان پر فخر ہے جس نے حملے کا منہ توڑ جواب دیا۔

منگل کی شام وسطی ضلع گاندربل میں عسکریت پسدوں نے بی جے پی کارکن غلام قادر راتھر پر حملہ کیا جس کے نتیجے میں شبیر احمد ساکن اونتی پورہ نامی ایک عسکریت پسند اور بی جے پی کارکن کا ایک ذاتی محافظ الطاف حسین ہلاک ہوا۔