گاندربل میں تلاشی کارروائی کے دوران اسلحہ اور گولہ بارود بر آمد

وسطی کشمیر کے ضلع گاندربل میں حفاظتی اہلکاروں نے تلاشی کارروائی کے دوران اسلحہ اور گولہ بارود بر آمد کیا۔

سیکورٹی فورسز نے بدھ کو وسطی کشمیر کے ضلع گاندربل میں نونر سے ملحقہ سردا باغ کے جنگلات میں تلاشی کارروائی کے دوران اسلحہ اور گولہ بارود کا ذخیرہ بر آمد کرنے کا دعویٰ کیا ہے۔

ایک پولیس افسر نے بتایا کہ اسپیشل آپریشن گروپ اور سی آر پی ایف کی 118 بٹالین نے مشترکہ طور پر سردا باغ کے جنگلات میں تلاشی مہم کے دوران گولہ بارود کا ذخیرہ بر آمد کیا۔

انہوں نے تفصیلات فراہم کرتے ہوئے کہا کہ اے کے47 کے دو میگزین کے ساتھ 9 ملی میٹر گولیاں، دیگر مختلف راؤنڈ اور کئی دستی بم بر آمد ہوئے ہیں۔

عہدیدار نے بتایا کہ اس سلسلے میں ایک کیس درج کرکے مزید تفتیش شروع کر دی گئی ہے۔