گاندربل: محکمہ جنگلات کی جانب سے شجر کاری مہم کا آغاز

محکمہ جنگلات کی جانب سے گا‌ندربل کے مانسبل رینج میں شجر کاری مہم شروع کی گئی ہے۔ اس مہم میں تقریباً تین ہزار کے قریب پیڑ لگائے جائیں گے جس میں دیودار، کایرو اور دیگر اقسام کے پیڑ قابل ذکر ہیں۔

یہ شجر کاری مہم سندھ فارسٹ ڈویژن گاندربل کی جانب سے شروع کی گئی ہے، اس مہم میں محکمہ کے ملازمین ‌نے بڑھ چڑھ کر حصہ لیا، جبکہ مانسبل رینج میں موجود ویران پہاڑوں کی خوبصورتی کو پھر سے بحال کرنے کے لیے ملازمین نے سر سبز پیڑوں کو لگانا شروع کیا ہے۔

اس شجر کاری مہم میں محکمہ کے پرنسپل چیف کنزرویٹر موہت گیرا نے بطور مہمان خصوصی شرکت کی۔ اس موقع پر انہوں نے ایٹی وی بھارت سے خصوصی گفتگو میں کہاکہ اس شجر کاری مہم کا مقصد جموں وکشمیر سر سبز بنانا ہے۔ اور اس کا نام گرین جموں وکشمیر رکھا گیا ہے۔

موہت گیرا نے کہا کہ' اس شجر کاری مہم کا آغاز ہم سرپنچ، پنچ، ڈی ڈی سی ممبران، میونسپل کارپوریشن، میونسپل کمیٹی، پولیس و دیگر محکمہ کے اشتراک سے کرتے ہیں، تاکہ جموں وکشمیر کی خوبصورتی میں مزید اضافہ ہو، دیگر ریاستوں کے لوگ یہاں سیر و تفریھ کے لیے آئیں۔ انہوں نے کہا کہ' اس مہم میں پیرا ملٹری فورس اور ڈیفنس کے لوگوں نے بھی حصہ لیا ہے۔