گاندربل: سنچائی کے لیے پانی نہ ہونے سے کسان پریشان

مقامی لوگوں کا الزام ہے کہ علاقے کی پادشاہی کنال کی حالت خستہ ہو چکی ہے۔ اس کی مرمت کے لیے متعلقہ محکمہ کوئی کام نہیں کر رہا ہے۔

ضلع گاندربل کے سرژ بالا کے کسانوں کو زمین میں پانی نہ ہونے کی وجہ سے مشکلات کا سامنا کرنا پڑ رہا ہے۔ پادشاہی کنال میں جو پانی آتا ہے وہ زمینداروں کی زمین کی سینچائی کرتا ہے، مگر پادشاہی کنال میں پانی نہ ہونے کی وجہ سے زمینداروں کو کافی مشکلات کا سامنا کرنا پڑتا ہے۔

یہ کنال گاندربل کے بہت سارے علاقے کے زمینداروں کو زمین کے لئے پانی مہیا کرتا ہے۔

یہ پادشاہی کنال محکمہ فلڈ اینڈ ارگیشن کے ماتحت ہے۔ مگر اس میں پانی نہ ہونے کی وجہ سے مقامی زمینداروں کو زمین کے لیے پانی نہیں مل رہا ہے جس کی وجہ سے زمینداروں میں تشویش ہے۔

مقامی لوگوں نے الزام لگایا کہ اس پادشاہی کنال کا گیٹ بھی خراب ہو چکا ہے، جس کی مرمت کے لیے متعلقہ محکمہ ابھی تک کوئی کام عمل میں نہیں لا رہا ہے۔

مقامی لوگوں نے الزام لگاتے ہوئے کہا کہ اس میں ابھی تک صفائی بھی نہیں ہوئی ہے، جس کی وجہ سے اس میں کافی خرابی آئی ہے۔

اس بارے میں جب ہم نے سرپنچ ایاز احمد سے بات کی تو انہوں نے بتایا کہ انہوں نے بہت بار متعلقہ محکمہ کے دروازے کھٹکھٹائے مگر وہ بات نہیں سنتے ہیں، جبکہ زمینداروں کو اس کا آبیانہ بھی ادا کرنا پڑتا ہے۔

اس بارے میں جب ہم نے اریگیشن اینڈ فلڈ کنٹرول کے اعلی افسر سے بات کی تو انہوں نے بتایا ایک دو دن میں پادشاہی کنال میں پانی زمین داروں کے لیے دستیاب ہوگا۔