Independence Day 2023 گاندربل میں قومی پرچم کو بائیں ہاتھ سے سلامی

وسطی کشمیر کے گاندربل ضلع میں یوم آزادی کی تقریب پر ضلع ترقیاتی کونسل کی چیئر پرسن نزہت اشفاق کی طرف سے قومی پرچم کو بائیں ہاتھ سے سلامی دینے کی تصاویر سوشل میڈیا پر کافی وائرل ہوگئی ہیں۔ مختلف لوگ اس بارے طرح طرح کی باتیں کررہے ہیں۔

گاندربل: وسطی کشمیر کے ضلع گاندربل کے مادر مہربان سٹیڈیم میں 77 ویں یوم آزادی کے موقع پر ڈی ڈی سی چیئرپرسن نزہت اشفاق نے سلیوٹ بائیں ہاتھ سے کیا ہے۔ جموں و کشمیر کے لیفٹیننٹ گورنر منوج سنہا نے منگل کو سرینگر کے بخشی اسٹیڈیم میں یوم آزادی کے موقع پر سلامی لی، وہیں وادی کشمیر کے ہر ضلع کے ساتھ ساتھ گاندربل میں بھی یوم آزادی کے موقع پر ڈسٹرکٹ ڈیولپمنٹ کونسل کی چیئرپرسن نزہت اشفاق نے مادر مہربان سٹیڈیم میں مارچ پاسٹ پر سلامی لی۔ اس دوران ان کے ہمراہ ایس ایس پی گاندربل شری نکھل بورکر، ضلع ترقیاتی کمشنر شامبیر سنگھ کے علاوہ ضلع کے تمام سرکاری افسران بھی موجود تھے۔

گاندربل کی تقریب اسلئے سماجی رابطہ گاہوں پر موضوع بحث بنی کیونکہ اس میں ڈی ڈی سی کی سربراہ نزہت اشفاق ترنگے کو دائیں کے بجائے بائیں ہاتھ سے سلامی دے رہی ہیں جبکہ انگے ارد گرد پولیس اور نیم فوجی دستوں کے افسران دائیں ہاتھ سلامی کیلئے اٹھائے ہوئے ہیں۔ حالانکہ پرچم کشائی سے قبل نزہت اشفاق دونوں بازؤں کو یکسان طور حرکت دے رہی ہیں۔ نزہت اشفاق ، گاندربل کے ایک سیاسی گھرانے سے تعلق رکھتی ہیں۔ انکے شوہر اشفاق جبار شیخ گاندربل اسمبلی حلقے سے جمون و کشمیر کی آخری اسمبلی کیلئے منتخب ہوئے تھے۔ اشفاق کے والد شیخ جبار ماضی میں نیشنل کانفرنس کے لیڈر اور اسمبلی ممبر رہے ہیں جنہیں نوے کی دہائی میں مبینہ عسکریت پسندوں نے ہلاک کیس کیا تھا۔

ڈسٹرکٹ ڈیولپمنٹ کونسل کے چیئرپرسن نزہت اشفاق نے خطاب کرتے ہوئے ضلع ترقیاتی منصوبوں پر روشنی ڈالی اور دعوی کیا ہے کہ مزید زیر تعمیر پروجیکٹ بہت جلد مکمل کیے جارہے ہیں۔ تاہم ان کی مارچ پاسٹ پر سلامی لینے کے دوران لوگ اور افسران اس وقت حیران رہ گئے، جب نزہت اشفاق جو کہ ڈسٹرکٹ ڈیولپمنٹ کونسل کی چیئرپرسن ہیں نے دائیں ہاتھ کے بجائے بائیں ہاتھ سے قومی پرچم کو سلیوٹ کیا۔

انہوں نے کہا کہ آج جموں و کشمیر اپنی تبدیلی اور پرامن ماحول کے لیے پہچانا جاتا ہے۔ انہوں نے کہا کہ انتظامیہ اس بات کو یقینی بنانے کی پوری کوشش کر رہی ہے کہ عام آدمی بغیر کسی دباؤ اور پریشانی کے اپنی مرضی کی زندگی گزار سکے۔ آج، نئی سڑکیں، بجلی کے نئے منصوبے، سنیما ہال کھل رہے ہیں، جب کہ بہت کچھ شروع ہونے والا ہے۔ اس دوران مارچ پاسٹ کے دوران نیم فوجی دستوں کے علاوہ پولیس، ہوم گارڈ اور مختلف اسکولی بچوں نے مہمان خصوصی اور قومی پرچم کو سلامی دی، جبکہ قومی ترانہ بھی گایا گیا، اور مختلف رنگارنگ پروگرام بھی پیش کیے گئے۔ آخر پر اچھی کارکردگی دکھانے والے بچوں، افسران اور کئی ملازمین کو مومنٹو سے نوازا گیا۔ جبکہ تقریب کے دوران حسب ضرورت سیکورٹی کے انتظامات کئے گئے تھے۔