نالہ سندھ سے غیر قانونی طور پر ریت وباجری نکالنے میں ریت مافیا سرگرم

جموں و کشمیر کے وسطی ضلع گاندربل کے وائل علاقے میں نالہ سندھ سے غیر قانونی طور پر ریت وباجری نکالنے میں ریت مافیا سرگرم ہے۔

اطلاعات کے مطابق وائل علاقے میں ریت مافیا نالہ سندھ سے دن دہاڑے باجری اور ریت نکالتے ہیں، اس ضمن میں علاقے کے لوگوں نے کہا کہ 'غیر قانونی طور پر کچھ لوگ نالہ سندھ کا وجود ختم کرنے پر تلے ہیں اس سے نہ صرف نالہ سندھ کا وجود ختم ہوگا، بلکہ پورے علاقے کو خطرہ لاحق ہے'۔

علاقے کے لوگوں نے مزید تفصیلات فراہم کرتے ہوئے کہا کہ 'چند خود غرض لوگ غیر قانونی اور ناجائز طریقے سے نالہ سندھ سے ریت اور باجری نکالتے ہیں، جس کی وجہ سے اس میں موجود مچھلیوں کا وجود بھی ختم ہورہا ہے، جبکہ اس کے ساتھ ساتھ نالہ سندھ کی خوبصورتی پر بھی بہت برا اثر پڑ سکتا ہے'۔

انہوں نے کہا کہ 'نالہ سندھ قدرتی خوبصورتی اور کئی اقسام کی مچھلیوں کے لیے پوری دنیا میں مشہور ہے، تاہم ایسے کارناموں سے اس کی شان ختم ہو سکتی ہے۔

علاقے کے لوگوں نے متعلقہ محکمہ پر سخت برہمی کا اظہار کرتے ہوئے کہا کہ 'متعلقہ محکمہ بلکل خاموش اور تماشائی بن بیٹھا ہے اور ایسا لگتا یہ ان کی ملی بھگت ہے'۔

انہوں نے اس ضمن میں گورنر انتظامیہ سے مداخلت کی اپیل کرتے ہوئے کہا کہ 'وہ نالہ سندھ سے ریت و باجری نکالنے والے ریت مافیاؤں کے خلاف سخت سے سخت کاروائی کی جائے، تاکہ آئندہ کوئی ایسی حرکت کرنے سے گریز کرے۔

ای ٹی وی بھارت کے نمائندہ نے جب ڈی ایم او گاندربل سے رابطہ کیا تو انہوں نے کہا کہ 'یہ غیر قانونی طریقے سے ریت اور باجری نکال رہے ہیں اور ان کے خلاف سخت سے سخت کاروائی عمل میں لائی جائے گی۔