Flashfloods In Kangan کنگن میں بادل پھٹنے سے سیلابی صورتحال، فصلوں کو نقصان

ے کنگن خانن علاقے میں جمعے کی صبح بادل پھٹنے سے ندی نالوں میں طغیانی آئی اور کئی مقامات پر مٹی کے تودے بھی گر آئے جس سے سڑکوں اور فصلوں کو نقصان پہنچا ہے۔ مقامی لوگوں نے نقصانات کا جائزہ لینے کی خاطر ٹیموں کو جائے وقوع پر روانہ کرنے کی اپیل کی۔

گاندربل: وسطی کشمیر کے گاندربل ضلع میں جاری موسلادھار بارش کی وجہ سے کئی علاقے زیر آب آچکے ہیں، جس کی وجہ سے لوگ سخت مشکلات کا سامنا کر رہے ہیں۔ وہیں تحصیل کنگن میں، خانن علاقے میں جمعے کی صبح بادل پھٹنے سے ندی نالوں میں طغیانی آئی اور کئی مقامات پر مٹی کے تودے بھی گر آئے جس سے سڑکوں اور فصلوں کو نقصان پہنچا ہے۔ اطلاعات کے مطابق جمعے کی صبح خانن کنگن علاقے میں موسم نے کروٹ لی جس کے ساتھ ہی بادل پھٹنے کی وجہ سے ندی نالوں میں سیلابی صورتحال پیدا ہوئی۔
مقامی لوگوں نے بتایا کہ شدید بارشوں کے نتیجے میں مٹی کے تودے بھی گر آئے جس وجہ سے سڑکوں اورکھڑی فصلوں کو نقصان پہنچا ہے۔انہوں نے مزید بتایا کہ بادل پھٹنے کی وجہ سے علاقے میں خوف و دہشت کا ماحول پھیل گیا اور لوگ گھروں میں سہم کررہ گئے۔مقامی لوگوں نے مزید بتایا کہ بادل پھٹنے کی وجہ سے کھڑی فصلوں کے ساتھ ساتھ کئی ڈھانچوں کو بھی نقصان پہنچا ہے۔ انہوں نے اعلیٰ حکام پر زور دیا کہ نقصانات کا جائزہ لینے کی خاطر فوری طورپر ٹیموں کو جائے وقوع کی اور روانہ کریں۔

محکمہ موسمیات کے مطابق وادی کشمیر میں اگلے چوبیس گھنٹوں کے دوران کہیں کہیں ہلکی سے درمیانی درجے کی بارشوں کا امکان ہے۔ متعلقہ محکمے کے ایک ترجمان نے بتایا کہ وادی میں اگلے چوبیس گھنٹوں کے دوران کہیں کہیں ہلکی سے درمیانی درجے کی بارشوں کا امکان ہے جبکہ اس دوران پونچھ اور راجوری اضلاع میں کچھ مقامات پر بھاری بارشیں ہوسکتی ہیں۔ انہوں نے کہا کہ کشمیر میں کہیں کہیں 22 جولائی تک رک رک کر بارشوں کا امکان ہے جبکہ جموں میں کئی مقامات پر بارشیں ہوسکتی ہیں۔