گاندربل میں اسلحہ سمیت عسکریت پسند گرفتار

گاندربل میں پولیس نے ناکے کے دوران ایک عسکریت پسند کو گرفتار کرنے کا دعویٰ کیا ہے۔

گاندرل پولیس نے ایک خفیہ اطلاع کی بنیاد پر کھن علاقے میں ناکہ قائم کیا۔ پولیس کے مطابق ناکے پر انہوں نے ایک نوجوان کو رکنے کا اشارہ کیا تاہم اس نے بھاگنے کی کوشش کی۔

ناکے پر تعینات پولیس پارٹی نے نوجوان کو گرفتار کر لیا۔ گرفتار نوجوان کی شناخت ارشد احمد میر ولد محمد سبحان میر ساکن سہپورہ، گاندربل کے طور پر کی گئی ہے۔

گاندربل پولیس کے مطابق گرفتار کیے گئے نوجوان کی تحویل سے دستی بم برآمد کیا گیا۔ پولیس نے اس ضمن میں ایف آئی آر 211/21 U/S 13، 39 ULA (P) ACT اور 7/25درج کر کے مزید تحقیقات شروع کر دی ہیں۔

انہوں نے مزید کہا کہ پوچھ گچھ کے دوران معلوم ہوا ہے کہ گرفتار نوجوان لشکر طیبہ /ٹی آر ایف کا معاون ہے جبکہ اُس نے اپنے بھائی لطیف احمد میر کو بھی عسکری تنظیم میں شامل کرایا۔

پولیس کی جانب سے جاری کیے گئے بیان میں کہا گیا ہے کہ گرفتار کیے گئے نوجوان نے متعدد افراد کو عسکری تنظیموں میں شامل ہونے کے لیے مائل کیا جن کی بڑے پیمانے پر تلاش شروع کی گئی ہے۔

گاندربل پولیس نے اشارہ دیا ہے کہ اس حوالے سے مزید گرفتاریاں متوقع ہیں۔