گاندربل: محبوبہ مفتی نے میاں الطاف کے ساتھ تعزیت کا اظہار کیا

وسطی کشمیر کے ضلع گاندربل کے مشہور روحانی بزرگ اور پدم بھوشن ایوارڈ یافتہ میاں بشیر احمد لاروی، جو نیشنل کانفرنس کے سینیئر لیڈر اور سابق وزیر جنگلات میاں الطاف کے والد بھی تھے، چند روز قبل 98 برس کی عمر میں انتقال کرگئے۔

سابق وزیر اعلیٰ و پی ڈی پی صدر محبوبہ مفتی اور سابق نائب وزیر اعلیٰ ڈاکٹر نرمل سنگھ نے میاں الطاف کے گھر جاکر ان کے ساتھ تعزیت پرسی کی۔

محبوبہ مفتی کے ہمراہ پی ڈی پی کے کئی سینیئر لیڈران بھی تھے۔ انہوں نے ضلع گاندربل میں میاں بشیر احمد لاروی کے مزار پر چادر چڑھاکر دعائے مغفرت کی۔

قابل ذکر ہے کہ گزشتہ روز عمر عبداللہ نے بھی نیشنل کانفرنس کے دیگر سینیئر لیڈران کے ہمراہ مرحوم کے مقبرہ پر گل باری کرکے مرحوم کے حق میں دعائے مغفرت کی تھی۔