مہنگائی اور لاک ڈاؤن کے پیش نظر خصوصی پیکیج کا مطالبہ

ضلع گاندربل میں کانگریس لیڈران و کارکان نے ایک میٹنگ کے دوران بڑھتی مہنگائی اور لاک ڈاؤن کی مار جھیلنے والے افراد کے لیے ایل جی انتظامیہ سے خصوصی پیکیج کا اعلان کرنے کی گزارش کی۔

وسطی کشمیر کے ضلع گاندربل میں کانگریس لیڈران و کارکان نے ایک میٹنگ کے دوران 24جون کو نئی دہلی میں منعقد ہوئی کل جماعتی میٹنگ کے حوالے سے کانگریس کی اعلیٰ قیادت کی پذیرائی کی۔

میٹنگ کے دوان کانگریس لیڈران نے بڑھتی مہنگائی پر تشویش کا اظہار کرتے ہوئے کہا کہ ’’مہنگائی کا براہ راست اثر غریب عوام پر پڑتا ہے۔ پیٹرل، ڈیزل اور رسوئی گیس سمیت اشیاء خورد و نوش کی بڑھتی قیمتوں نے عوام کی جینا دوبھر کر دیا ہے۔‘‘

انہوں نے لیفٹیننٹ گورنر انتظامیہ سے مسلسل لاک ڈاؤن اور مہنگائی کی مار جھیل رہے غریب لوگوں کے لیے خصوصی پیکیج کا اعلان کیے جانے کی گزارش کی۔

انہوں نے خودکشی کے بڑھتے رجحان پر تشویش کا اظہار کرتے ہوئے کہا: ’’جموں و کشمیر میں بے روزگاری نے اس قدر سنگين رخ اختيار کیا ہے کہ ہمارے نوجوان خودکشی جیسے اقدامات اٹھا رہے ہیں۔‘‘ انہوں نے انتظامیہ سے نوجوانوں کے لیے فوری طور روزگار کے مواقع پیدا کرنے کے لئے اقدامات اٹھائے جانے کی اپیل کی۔

دریں اثناء، میٹنگ کے دوران لیڈران و کارکنان نے گزشتہ ماہ نئی دہلی میں منعقد ہوئی کل جماعتی میٹنگ کے دوران ’’جموں و کشمیر کے عوام کی خواہشات کے مطابق گفتگو کرنے اور عوام کی صحیح ترجمانی کرنے‘‘ پر کانگریس کی اعلیٰ قیادت کی پذیرائی کی۔