Eid ul Adha at Ganderbal: گاندربل میں نماز عیدالاضحیٰ ادا کی گئی

جموں و کشمیر کے ضلع گاندربل میں بھی عیدالاضحیٰ منائی جارہی ہے۔ کشمیر میں عید کا سب سے بڑا اجتماع درگاہ حضرت بل میں منعقد ہوا۔ Eid ul Adha celebrated in Ganderbal

ملک کی تمام ریاستوں کے ساتھ ساتھ جموں و کشمیر کے ضلع گاندربل میں بھی عیدالاضحیٰ منائی جارہی ہے۔ کشمیر میں عید کا سب سے بڑا اجتماع درگاہ حضرت بل میں منعقد ہوا جہاں ہزاروں لوگوں نے نماز عید میں شرکت کرکے کشمیر میں امن اور خوشحالی کے لیے دعائیں کی۔ Eid ul Adha celebrated at Ganderbal

وہیں ضلع گاندربل کے ہر ایک تحصیل ہیڈکوارٹر کے ساتھ ساتھ سب سے بڑا اجتماع مرکزی جامع مسجد دودرہامہ میں منعقد ہوا، جہاں سیکنڑوں فرزندان توحید نے عید گاہ کے بجائے مسجد میں ہی نمازِ عید کی ادائیگی کو ترجیح دی، کیونکہ موسم کی خرابی کی وجہ سے عید گاہ میں نماز عید ممکن نہیں ہو سکی۔ اس موقع پر لوگ ایک دوسرے کو مبارکباد دیتے ہوئے دیکھے گئے، جب کہ چھوٹے چھوٹے بچوں کے چہروں پر صاف طور پر خوشی دکھائی دے رہی تھی۔

ضلع انتظامیہ گاندربل نے نماز عید کے موقع پر سیکورٹی کے اچھے خاصے انتظامات کیے تھے۔ واضح رہے کہ عید الاضحی حضرت ابراہیمؑ کی اپنے بیٹے اسماعیل کی قربانی کے لیے آمادگی کی یاد میں منائی جاتی ہے۔ جس کے دوران لوگ نماز عید مکمل ہونے کے بعد بھیڑ، بکرے یا دیگر حلال جانوروں کی صورت میں قربانی پیش کرتے ہیں۔

عید الاضحی اسلامی کیلنڈر کے آخری مہینے ذی الحجہ کی 10 تاریخ کو ہوتی ہے۔ اس دوران عید قربان کی فضیلت بیان کرتے ہوئے امام جامع گاندربل مولوی محمد امین نے کہا 'عید الاضحیٰ ہمیں قربانی اور اللہ پر بھروسہ کا سبق دیتی ہے۔ میرا خطبہ اس بات پر بھی توجہ مرکوز کر رہا ہے کہ کس طرح حضرت ابراہیم علیہ السلام اپنے ایمان کی وجہ سے اللہ کے امتحان میں کامیاب ہوئے۔ ہمیشہ کی طرح ہم امید اور دعا کرتے ہیں کہ یہ عید اس وادی میں خوشیاں اور خوشحالی لائے۔'