گاندربل: سائبر کرائمز کے بارے میں بیداری پیدا کرنے کے لیے گاندربل پولیس نے گنڈ کے گورنمنٹ ہائیر سکنڈری اسکول میں سائبر کرائم بیداری پروگرام کا انعقاد کیا۔ اطلاعات کے مطابق آئے روز سائبر فراڈ کے بڑھتے واقعات کو دیکھتے ہوئی ایس ایس پی گاندربل نکھل بورکر کی ہدایت پر ایس ڈی پی او کنگن مظفر جان کی نگرانی میں پولیس اسٹیشن گنڈ نے بائیر سیکنڈری میں ایک روزہ سائبر کرائم سے متعلق ایک جانکاری پروگرام کا اہتمام کیا جس میں ایس ایچ او گنڈ سمیت دیگر پولیس افسران مقامی معزز شہری، نوجوان اور طلباء شامل تھے۔
پروگرام میں موجود تمام شرکاء کو مختلف قسم کے سائبر خطرات/جرائم جیسے چوری، کریڈٹ کارڈ فراڈ، ڈیٹا چوری، سائبر اسٹالنگ، پورنوگرافی، OTP فراڈ وغیرہ کے بارے میں جانکاری فراہم کی گئی۔ اس موقع پر خطاب کرتے ہوئے سینئر پولیس افسران نے شرکاء کو مشورہ دیا کہ وہ محفوظ براؤزنگ کی عادتیں اپنائیں، انٹرنیٹ پر سرفنگ کرتے وقت مشکوک ویب سائٹس سے گریز کریں۔ انہوں نے شرکاء سے OTP یا بینک اکاؤنٹ کی تفصیلات اور پاس ورڈز شیئر نہ کرنے کی بھی اپیل کی۔