ڈسٹرکٹ پولیس لائنز گاندربل کے احاطے میں جموں و کشمیر پولیس کے فرنٹ لائن وارئرس کے لئے جمعرات کو ٹیکہ کاری مہم کا آغاز کیا گیا۔
اس موقع پر ایس ایس پی خلیل احمد پوسوال کو سب سے پہلے ویکسین دی گئی۔
ایس ایس پی گاندر بل نے کہا کہ ’’کورونا وائرس کے خلاف ہمارے دفاع کو مستحکم کرنے کے لیے ٹیکہ کاری کی یہ مہم اہم ہے اور ہمارے روزمرہ کی زندگی کو دوبارہ شروع کرنے میں یہ ویکسین مدد فراہم کرے گی۔‘‘
انہوں نے اس موقع پر ان تمام پولیس عہدیداروں کی کاوشوں کو سراہا جنہوں نے کروناوائرس کے وبائی مرض کے خلاف اپنی کوششوں میں اہم کردار ادا کر رہے ہیں۔ انہوں نے پولیس عہدیداروں کو ویکسین کی خوراکیں دلانے میں مدد کرنے پر محکمہ صحت کا بھی شکریہ ادا کیا۔
واضح رہے کہ کورونا وائرس سے لوگوں کو محفوظ رکھنے کے لئے بھارت بھر میں دنیا کی سب سے بڑی ٹیکہ کاری مہم جاری ہے اور گزشتہ اٹھارہ دنوں میں ملک بھر میں اکتالیس لاکھ سے زائد افراد کو ٹیکہ لگایا جا چکا ہے۔