گاندربل: مرکز کے زیر انتظام خطہ جموں و کشمیر کے ضلع گاندر بل میں بین الاقوامی یوم حیاتیاتی تنوع کے موقع پر جموں و کشمیر بائیو ڈائیورسٹی کونسل کی جانب سے ایک معروف تعلیمی ادارے کے ساتھ ایک اشتراکی تقریب کا انعقاد کیا گیا۔ اس تقریب کا موضوع حیاتیاتی تنوع کے دن 2023 کے "معاہدے سے عمل تک - حیاتیاتی تنوع کو واپس بنائیں" پر مرکوز تھا۔
ڈاکٹر سید طارق پروجیکٹ کوآرڈینیٹر جے کے ایف آر آئی اور انچارج بائیو ڈائیورسٹی کونسل کشمیر نے اس تقریب کا افتتاح کیا اور حیاتیاتی تنوع کے تحفظ سے متعلق ایک تفصیلی پریزنٹیشن پیش کی۔ انہوں نے طلباء سے خطاب کیا اور انہیں ان ضروری احتیاطی تدابیر سے آگاہ کیا جو آنے والی نسلوں کے مستقبل کو محفوظ بنانے کے لیے ضروری ہے۔
انہوں نے گرین سوسائٹی کے لیے تعاون میں جی وی ای آئی کے کردار کا بھی ذکر کیا۔ یہ بھی بتایا گیا کہ یہ اسکول اس وقت 150 مختلف اقسام کے پودوں کا گھر ہے جن کی دیکھ بھال اسکول انتظامیہ کر رہا ہے۔ تقریب کے مہمان خصوصی نذیر بی نذیر، چیئرمین نیشنل سوسائٹی فار پروٹیکشن آف آبی وسائل، ویٹ لینڈز اینڈ فاریسٹ تھے۔ ممبر کیمپا ایگزیکٹو کمیٹی ممبر گرین انڈیا مشن، ممبر وائلڈ لائف ایڈوائزری بورڈ جموں و کشمیرب نذیر بی نذیر نے حیاتیاتی تنوع کے تحفظ کے لیے بچوں کے فرائض پر توجہ دی۔ انہوں نے طلباء کو مشورہ دیا کہ وہ ایک بہتر طرز زندگی کو اپنائیں تاکہ معاشرے میں تبدیلی آئے اور ماحول دوست طرز عمل نسلوں میں عام ہو سکے۔ تقریب حلف برداری کا بھی انعقاد کیا گیا جس میں طلباء اور دیگر شرکاء نے ماحول دوست رہنے اور ماحول کو آلودہ کرنے والے اور قدرتی ماحول کو تباہ کرنے والے طریقوں سے پرہیز کرنے کا حلف لیا۔
مزید پڑھیں:world environment day: عالمی یومِ ماحولیات
اس کے علاوہ، محمد لطیف بھٹ، ڈی ایف او ریسرچ فاریسٹ ڈویژن سری نگر اور ڈی ایف او جموں و کشمیر یو ٹی بائیو ڈائیورسٹی کونسل کشمیر- (JKUTBC) نے بھی بہتر مستقبل کی تعمیر کے نئے طریقوں کو اپنانے کی اہمیت پر تبادلہ خیال کیا۔ انہوں نے معززین کا شکریہ ادا کیا اور کلمات تشکر بھی پیش کیا۔ پروگرام کے اختتام پر ایک پروقار تقریب کا انعقاد کیا گیا جہاں بایو ڈائیورسٹی کونسل نے چیئرمین ایجوکیشنل انسٹی ٹیوٹ کو سرسبز معاشرے کے لیے ان کی بے مثال خدمات اور مہمان خصوصی جناب نذیر بی نذیر کو فیلڈ میں ان کے غیر معمولی کام کے لیے اعزازی ٹوکن پیش کیا۔
