ڈوڈہ: ٹھاٹھری ٹراما سنٹر میں وینٹیلیٹر کا افتتاح

جموں و کشمیر میں پہاڑی ضلع ڈوڈہ کے ٹھاٹھری ٹراما سنٹر میں ڈی ڈی سی نے وینٹیلیٹر کا افتتاح کیا۔

کورونا وائرس وبا سے قبل ضلع ڈوڈہ کے کسی بھی اسپتال بشمول ڈسٹرکٹ اسپتال ڈوڈہ میں وینٹیلیٹر کی سہولت میسر نہیں تھی، تاہم طبی ڈھانچے کو مستحکم بنانے کی غرض سے ضلع اسپتال سمیت دیگر سب ضلع اسپتالوں میں بھی وینٹیلیٹر رکھے جا رہے ہیں تاکہ ہنگامی صورتحال کے دوران مریضوں کو نزدیکی اسپتال میں طبی امداد فراہم کی جا سکے۔

ضلع ترقیاتی کمشنر ڈوڈہ ڈاکٹر ساگر ڈی ڈائفوڈ نے ہفتہ کو قصبہ ٹھاٹھری کے ٹراما سنٹر میں وینٹیلیٹر کا افتتاح کیا۔ ضلع انتظامیہ ڈوڈہ نے ہنگامی صورتحال اور کورونا وائرس کی روک تھام کے لئے ٹراما اسپتال میں وینٹیلیٹر دستیاب رکھنے کا فیصلہ کیا ہے، تاکہ کورونا سے متاثرہ مریضوں کو وینٹیلیٹر کی سہولیت آسانی سے مل سکے۔

عالمی سطح پر پھیلے مہلک کورونا وائرس نے جہاں کروڑوں افراد کو اپنی چپیٹ میں لے لیا ہے وہیں جموں و کشمیر میں بھی مہلک وائرس کے سبب سینکڑوں افراد فوت ہو چکے ہیں۔

جموں و کشمیر کے پہاڑی ضلع ڈوڈہ میں بھی کورونا وائرس تیزی کے ساتھ پھیل رہا ہے جس کی وجہ سے درجن سے زائد لوگوں کی موت بھی واقع ہوئی ہے۔