ڈوڈہ میں غیر قانونی کان کنی کے خلاف ضلع انتظامیہ کی کارروائی

جموں و کشمیر میں دریائوں اور ندی نالوں سے ریت یا باجری از خود نکالنے پر پابندی عائد کیے جانے کے باوجود آزادانہ طور ریت باجری اور پتھر نکالنے کا کام جاری ہے۔

ضلع ڈوڈہ میں غیر قانونی طور کان کنی کرنے کی پاداش میں انتظامیہ نے جودھپور نالہ کے قریب دو جے سی بی مشینوں کے علاوہ ایک ٹپر کو بھی ضبط کیا۔

ایڈیشنل ڈسٹرکٹ مجسٹریٹ (اے ڈی سی) ڈوڈہ اور تحصیلدار نے ضلع ڈوڈہ کی جودھپور سڑک کا معائنہ کرنے کے دوران جودھپور نالہ کے قریب کان کنی کر رہے افراد سے پوچھ تاچھ کرکے ان سے دستاویز اور اجازت نامہ طلب کیا۔

اے ڈی سی کے مطابق وہ غیر قانونی طور کان کن کر رہے تھے جس کی پاداش میں ٹپر اور جے سی بی کے کاغذات سیز کیے گئے۔

ذرائع ابلاغ کے نمائندں سے بات کرتے ہوئے اے ڈی سی نے عوام سے غیر قانونی طور کان کنی سے اجتناب کرنے کی اپیل کرتے ہوئے کہا کہ ’’غیر قانونی طور ریت، باجری یا پتھر نکالنے والے افراد کے خلاف قانونی کارروائی کی جائے گی۔‘‘

انہوں نے مستقبل میں بھی اس طرح کی کارروائی جاری رکھنے کا عندیہ دیا۔

قابل ذکر ہے کہ جموں و کشمیر میں انتظامیہ نے کان کنی پر پابندی عائد کرکے اس کام کے لیے باضابطہ ایک کنٹریکٹ نظام کا قیام عمل میں لانے کی ہدایات دی ہے جس کے پیش نظر آزادانہ طور پر ریت اور باجری نکالنے کو غیر قانونی قرار دیا گیا ہے۔