ڈوڈہ میں موٹر سائیکل اور آلٹو گاڑی کے درمیان ٹکر، ایک شخص ہلاک

ضلع ڈوڈہ میں بٹوت کشتواڑ قومی شاہراہ پر ٹھاٹھری قصبہ کے قریب ایک موٹر سائیکل اور آلٹو گاڑی کے درمیان تصادم ہونے سے موٹر سائیکل سوار کی موقع پر ہی موت واقع ہوگئی۔

جموں و کشمیر کے ضلع ڈوڈہ میں بٹوت کشتواڑ قومی شاہراہ پر واقع قصبہ ٹھاٹھری کے نزدیک ایک موٹر سائیکل اور آلٹو گاڑی کے درمیان زور دار ٹکر میں موٹر سائیکل سوار کی موقع پر ہی موت واقع ہوگئی۔

تفصیلات کے مطابق یہ حادثہ دو بجے کے قریب پیش آیا جب موٹر سائیکل پر سوار بیس سالہ نوجوان ٹھاٹھری سے ڈوڈہ کی طرف جا رہا تھا کہ قصبہ ٹھاٹھری کے زیرو پوائنٹ پر ایک الٹو گاڑی کے ساتھ تصادم ہوگیا۔

ذرائع کے مطابق متاثرہ نوجوان کی شناخت گپتیشور سنگھ ولد دلچند کے طور پر ہوئی جو کہ ناگنی کھٹیارہ تحصیل کہارا کا رہنے والا ہے۔

ہلاک شدہ نوجوان کے بھائی ارون سنگھ جو کہ حادثہ کا عینی شاہد بتایا جا رہا ہے، اس نے بتایا کہ گپتیشور ٹھاٹھری زیرو پوائنٹ پر بائیک کو پیچھے کر رہا تھا کہ اچانک آلٹو گاڑی نے ٹکر مار دی جس کے نتیجہ میں اس کے بھائی کی موقع پر ہی موت واقع ہوگئی۔

اس سلسلے میں پولیس نے آئی پی سی سیکشن 279 اور 304A کے تحت پولیس تھانہ ٹھاٹھری میں کیس درج کر کے مزید تحقیقات شروع کر دی ہے۔