ڈوڈہ: آتشزدگی میں لاکھوں کی املاک خاکستر

پہاڑی ضلع ڈوڈہ میں آتشزدگی کی ایک ہولناک واردات میں لاکھوں کی املاک راکھ کے ڈھیر میں تبدیل ہوگئی۔

خطہ چناب کے قصبہ ڈوڈہ میں پیر کی صبح نگری علاقے میں ایک نجی دکان میں لگی آگ کے سبب لاکھوں روپیے مالیت کا سامان راکھ کے ڈھیر میں تبدیل ہوگیا۔

عینی شاہدین کے مطابق آگ نے آناً فاناً پوری دکان کو اپنی زد میں لے لیا، تاہم اس سانحے میں کسی جانی نقصان کی کوئی اطلاع نہیں ہے۔

مقامی باشندوں نے فوری طور پر پولیس اور فائر اینڈ ایمرجنسی عملہ کو مطلع کیا۔ فائر اینڈ ایمرجنسی نے آگ کو مزید پھیلنے سے روک لیا تاہم اس دوران لاکھوں کی املاک راکھ کے ڈھیر میں تبدیل ہوچکی تھی۔

پولیس نے اس ضمن میں معاملہ درج کرکے آگ لگنے کی وجوہات کا پتہ لگانے کے لیے تفتیش شروع کردی ہے۔