جموں و کشمیر کے ضلع ڈوڈہ کی چودہ نشستوں پر کامیابی حاصل کرنے والے ضلع ترقیاتی کاونسلر اب اپنے اپنے حلقوں میں جلسے منعقد کرکے لوگوں کا شکریہ ادا کر رہے ہیں.
ضلع میں متعدد مقامات پر جیت کا جشن ہر کوئی اپنے انداز میں منا رہا ہے، کوئی مخالفین کی طرف اپنے ڈھول نگاڑوں کی آواز پہنچانا چاہتا ہے، تو کوئی آتش بازی کے ذریعے مخالفین کو اپنی طاقت دکھانا چاہتا ہے۔
حیرت کی بات یہ ہے کہ ضلع ڈوڈہ کے ڈی ڈی سی حلقہ گندنہ اور گھٹ میں ہارنے والے بھی اتنے ہی خوش ہیں، جتنے کامیاب ہونے والے خوش ہیں، گزشتہ روز گھٹ میں گندنہ حلقہ سے کامیاب ہونے والے نیشنل کانفرنس کے وکیل سید عاصم ہاشمی اور حلقہ گھٹ سے کانگریس کے ڈی ڈی سی کونسلر ریاض کے ساتھ ایک ہی مقام پر جلسہ تشکر کا انعقاد کیا۔
پروگرام میں دونوں جماعتوں کے حامیوں نے ایک ہی سُر میں زندہ آباد کے نعرے لگائے اور حلقہ گھٹ میں نیشنل کانفرنس کو شکست سے دوچار ہونے باوجود بھی کارکنان کو جلسہ میں خوشی کے اظہار کا موقع ملا، اس موقع پر ضلع ترقیاتی کاونسلروں کے علاوہ سرپنچوں نے بھی شرکت کی۔