وادی کشمیر سمیت خطہ چناب میں بھی گزشتہ شب زلزلے کے زور دار جھٹکے محسوس کیے گئے جس کے سبب لوگ خوفزدہ ہوکر گھروں سے باہر نکل آئے تاہم حکام کے مطابق کسی جانی نقصان کی کوئی اطلاع نہیں ہے۔
وادی کشمیر اور خطہ چناب کو seismic zoneکے زمرے میں شمار کیا جاتا ہے جس کے سبب یہاں زلزلوں کے سبب بھاری تباہی کے امکانات ہیں۔
ضلع ڈوڈہ کے باشندوں نے ای ٹی وی بھارت کے ساتھ بات کرتے ہوئے کہا کہ گزشتہ شب زلزلہ کی وجہ سے اگرچہ جانی نقصان نہیں ہوا، تاہم مستقبل میں زلزلوں کے شدید جھٹکوں سے بھاری تباہی کو بھی سائنسدان مسترد نہیں کرتے۔
مقامی باشندوں کے مطابق گزشتہ شب زلزلے کے بعد خوفزدہ لوگوں نے بھگدڑ مچادی اور کہیں کہیں چیخ و پکار بھی سننے کو ملی۔
لوگوں کا کہنا ہے کہ انتظامیہ کو زلزلوں کے وقت اپنائے جانے والے رہنمایانہ خطوط سے متعلق عوام کو بیدار کرنا چاہئے۔ انہوں نے انتظامیہ سے جموں و کشمیر خصوصا وادی کشمیر اور خطہ چناب میں زلزلوں سے متعلق آگہی مہم شروع کیے جانے کی اپیل کی۔